Shillong, Rymphang 11 : Ka jingdon kiba ïap na ka jingbthei ha par dewiong ha Thangkso, East Jaintia Hills ka la kiew mynta sha ka 31 ngut, pyntip u Executive Director jong ka State Disaster Management Authority, Shillong.
Ha kajuh ka por la pyntip ruh ba ki la don haduh 10 ngut kiba mynsaw bad ki dang don mynta ha ka jingshah sumar.
Lah ruh ban kdew hangne ba na ka liang ka sorkar jylla ka la thung da ka Judicial Inquiry Commission ban tohkit bniah halor ka jingbthei ha katei ka krem dewïong dang shen ha Thangsko haduh ba ka la shim ïa ka jingim jong ki phew ngut ki briew.
Dang shen na ka liang u Symbud Myntri Rangbah ka Jylla Bah Prestone Tynsong u la ong ba ka sorkar jylla ka la ïakhun tyngeh ban tehlakam ïa ka jingtih dewïong beaiñ ha ka jylla bad ki la bthah ruh ïa ki bor distrik ba kin leh lut katba ki lah ban pyntikna ba ki kam beaiñ ki dei ban sangeh noh shi syndon.
Ha kajuh ka por haba jubab halor ka jingkylli u Bah Prestone u la pyntip ruh ba ka sorkar mardor ka la shimkhia ha kaba la ïoh ruh ban kem katto katne ngut halor kane ka jingjia katba ka jingbuddien ka dang ïaid.
