Sha ka 30 ngut kiew ka jingïap bthei bom ha krem dewïong Mynsngat-Thangsko
*Ki bor pulit ki la kurup noh ïa u dewïong beaiñ*
Khliehriat rymphang 10: Na ka jingbthei bom dynamite kaba la jia ha ka krem dewïong beaiñ ha Mynsngat ha ka thaiñ Thangsko East Jaiñtia Hills District kaba la jia myn ha ka 5 tarik mynta u bnai Rymphang, ki la don haduh 30 ngut ki briew kiba la iap, don kiba khlad ha katei ka jaka ba bthei bom bad don bun ruh kiba khlad ha ki jaka ai jingsumar.
Hynnin ka sngi ruh ka 9 tarik u Rymphang, 2026 ki la don lai ngut kiba shah sumar namar ka jingmynsaw bad ki la khlad noh, u Raju Tamang, 34 snem ka rta uba shah sumar ha NEIGRIHMS u la iap noh ha ka janmiet 9 tarik u Rymphang, 2026 katba ar ngut ki dei kiba shah sumar ha Silchar Medical College and Hospital ha ka Jylla Assam.
Kum ban shu phai dien, ka jingsei ïa ki metiap ha ka sngi ba jia ka jingbthei ka dei 18 ngut, nangta 8 ngut pat la sei ha ka sngi kaba bud lem uwei uba iap ha NEIGRIHMS kaba long baroh 27 ngut bad hynnin pat lai ngut kiba khlad.
Ha kawei pat ka bynta na ka liang ki bor pulit bad majistor kiba na ki bor pynïaid District ka East Jaiñtia Hills,ha ka jingleit khynra ïa ki dewiong beaiñ ki la ïoh ban kurup noh 6 Metric Ton u dewïong beain na Lumshyrmit–Cham Cham, 10 MT narud surok hajan Cham Cham bad Mukhaialong, 2 MT narud surok Mutong sha Mukhaialong bad 20 MT na Pynthorsale bad ki la la pynjot bad pynpra noh ruh ïa ki camp ba sah ki nongbylla tih dewïong beaiñ ha ki jaka bapher bapher ha East Jaiñtia Hills District.
Ki bor pynïaid District ka East Jaiñtia Hills ki la rejistar FIR ha kaba ïadei bad ki kam tih dewïong beaiñ bad ka jingtohkit ïa kiba donkti ha kane ka kam ka dang ïaid sha khmat. Shuh shuh ki bor pynïaid District ka East Jaiñtia Hills ki la pyntip ba ka pisa 24 lak la aiti sha ki longïing jong 8 ngut kiba iap na katei ka jingjia bthei bom dynamite ha Thangsko bad ong ruh ba ka jingsiew bad ïarap pisa pisa kan dei halor ka jingpynshisha ïa ki kot ki sla da ki bahaïing.