Halor ka jingïap ki 30 ngut : Kam dei ka por ban ïakdewkti bad shim kabu politik ong u Dy.CM

Shillong, Rymphang 10: U Symbud Myntri Rangbah ka Jylla u Ma Sniawbhalang Dhar u la kyntu ba ha kum kane ka por ba jia ka jingiap jong ki 30 ngut ki mynsiem briew ha ka jingbthei bomb dynamite ha par dewiong donkam ban ïa kiar noh na kaba kdew kti bad shim kabu politik namar jinglong jingman kaba mynta kam dei ka por ban shimkabu ban ïoh nong ha ka saiñ pyrthei hynrei ban ïatrei lang bad ai jingmut lang kaei kaba dei ban leh bad u la pynthikna ruh ba ka Sorkar kan nym map hynrei kan leh da kaba tyngeh ïa kito kiba donkti ha ki kam tih dewiong beaiñ.
Haba ïakren bad ki lad pathai khubor, u Symbud Myntri Rangbah u phah ïa ka jingsngewlem sha ki longïing kiba la shah ktah ha ka jingbthei bomb dynamite kaba jia dang ha ka 5 tarik Rymphang 2026 ha Mynsngat-Thangsko kaba la shim ïa ka jingim jong 30 ngut ki mynsiem briew.
“Nga phah ïa ka khubor jingsngewlem sha baroh ki longïing kiba shah ktah. Sngewbha kynmaw ba mynta kam dei ka por ban ïalehkai politik” ong u Ma Sniawbhalang.
U Ma Sniawbhalang u la pynksan ïa ka jingkitkhlieh lang, da kaba ong “Ka dei ka por ban shim ïa ka jingkitkhlieh lang ha kum kane ka jingjia kaba sngewsih”.
U la pynthikna ba ka Sorkar ka la shimkhia da kaba phah ïa ki kynhun sha katei ka jaka bad ki heh Sorkar, kynthup ïa u DC bad SP, ki don ha katei ka jaka ban peit bad bishar ïa ka jinglong jingman ha katei ka jaka.
“Ngin ym pyllait ïa uno uno u briew uba donkti” ong u Ma Sniawbhalang haba bynrap ba ka Sorkar kan leh da ka ba tyngeh ïa kito kiba donkti ha ki kam beaiñ.
U Symbud Myntri Rangbah u la pdiang ïa ki jingkynnoh pyrshah ïa ka Sorkar MDA, da kaba ong “Ngi pyrshang katba lah ban tehlakam, ka Sorkar ka pyrshang pura ban tehlakam bad ban pynthikna ba kan ym don ka jingtih dewiong beaiñ”.
Haba ïadei bad ka kyndon ba la buh da ka sorkar pdeng ba donkam jaka kaba heh 100 hectare ban tih dewiong katkum ka juk stad mynta (Scientific Mining), u Ma Sniawbhalang u la ïathuh ba u Myntri Rangbah ka Jylla u Conrad K Sangma u la ïakren ïa kane ka kam bad ka Sorkar Pdeng da kaba kyrpad ban pynduna ïa ka kyndon jingheh jaka ban ailad ïa ki trai jaka ba kin ïoh tih dewiong katkum ka juk stad mynta (Scientific Mining).
“Ngi la ïoh ïa ka dorkhas na ki trai par dewiong kiba pynpaw ba ka jaka 100 hectare ka long kaba heh palat. U Myntri Rangbah ka Jylla ha kane ka shisnem ba la dep, u la rah ïakren ïa kane ka mat bad ka Sorkar Pdeng da kaba kyrpad ïa ka jingdonkam ban pynduna ïa ka jingheh ka jaka khnang ba ki trai Jylla kin lah ban shimti ïa ka jingtih dewiong katkum ka juk stad mynta (Scientific Mining) ha kylleng ka Jylla. Kumta, kane ka kam ka dang don hapdeng ka jingïakren”.
U Ma Sniawbhalang u la pynksan baka Sorkar ka pyrshah ïa ki kam beaiñ da ka ba ong “Ka Sorkar kam kyrshan ïa ki kam beaiñ. Namar kine ki briew, kiba pynleit jingmut ha ki kam beaiñ, ki briew ki la duh ei ïa la ki mynsiem”.