Pynlong ka PIB Shillong ïa ka Vartalap halor ka Viksit Bharat-Guarantee (Gramin) ha Tura

Shillong, Rymphang 10: Ka Press Information Bureau, Shillong ka la pynlong ïa ka prokram Vartalap ha Tura, Meghalaya halor ka Viksit Bharat – Guarantee for Rozgar and Ajeevika Mission (Gramin) [VB-GRAM G] da ka jingthmu ban kyntiew ïa ka jingpynsngewthuh bad pynshlur ïa ka jingsynshar kaba ïashim bynta lang ha ki jaka nongkyndong, kaba ïahap bad ka jingthmu jong ka ri na ka bynta ka Viksit Bharat @2047.
Ha kane ka prokram la sakhi ïa ka jingïashim bynta jong ki heh ophisar ba kongsan ha ka distrik, ki nongthoh khubor, ki samla pule, bad kito kiba don bynta ha kane ka kam. Ki jingïakren ki la pynleit jingmut ha ka jingthmu ba ïashim bynta lang, ka jingpynïasoh lang ïa ki skhim jong ka sorkar, ka jingpynmih ïa ki lad kamai kajih (rozgar bad ajeevika) bad ka jingkyntiew ïa ka roi ka par ba ïalam da ki paidbah ha ki jaka nongkyndong.
Haba ai jingkren ha ka jingïalang, u Nipon Hajong, ADC & Project Director, DRDA, u la batai bniah kumno ka Viksit Bharat – Guarantee for Rozgar and Ajeevika Mission (Gramin) ka ïahap bad ka jingthmu ba ïar jong ka Viksit Bharat @2047, kaba thmu ban pynkylla ïa ka India sha ka ri kaba la kiew shaphrang shuwa u snem 2047. U la ban jur ba ki shnong kiba la pynkupbor ki long ka nongrim jong kane ka jingthmu bad ba ka roi ka par kadei ban long kaba ïadei bad ki paidbah, kaba kynthup lang ïa baroh, bad kaba ïashim bynta lang.
U Hajong u la ban jur ruh ïa ki jingmyntoi na ka VB-GRAM G, kynthup ïa ka jingthikna shuh shuh ban ïoh ïa ki sngi trei, ka jingsiew ïa ka bainong ha ka por kaba biang, ka jingthaw ïa ki jingdon jingem kiba seisoh ha ki jaka nongkyndong, bad ka jingpyndonkam ïa ki lad digital ban pynduna ïa ka jingpynslem bad ka jingjah pisa, da kaba pynthikna ïa ka jingshai, ka jingtreikam kaba paka, bad ka jingpynpoi ïa ka jingshakri hapoh ki sienjam ba ïadei bad ka ïohkam ïohjam bad ki lad kamai kajih ha ki jaka nongkyndong.
U la ong shuh shuh ba kum kine ki prokram pynphriang jingtip ki ïarap ban wanrah ïa ka jingsngewthuh hapdeng ki paidbah lyngba ka jingpyndonkam hok ïa ki lad pathai khubor bad ka jingïatreilang jong kito kiba don bynta ha kane ka kam. U la ban jur ba ki nongshong shnong kiba don ka jingtip ki long kiba kongsan na ka bynta ka jingsynshar kaba ïashim bynta lang bad ba ki rynsan kum ka Vartalap ki ïarap ban pyndap ïa ka jingduna ka jingtip hapdeng ki sienjam jong ka sorkar bad ki paidbah, ban pynthikna ïa ka jingïoh jingtip bad jingpyntreikam kaba kham bha.
Ka Cherime W. R. Sangma, Block Development Officer (BDO), Rongram Block, ka la batai ïa ki bynta ba kongsan jong ka Viksit Bharat – Guarantee for Rozgar and Ajeevika Mission (Gramin), da kaba ban jur halor ka jingthmu ba ïashim bynta lang, ka jingithuh ïa ki jingdonkam ba kyrpang jong ki shnong, bad ka jingpyntreikam pura ïa ki sienjam ba ïadei bad ka roi ka par. Ka la ong ba ïa ki Viksit Gram Panchayat Plan (VGPP) la pynkhreh ha ki shnong lyngba ka rukom pynkhreh kam na trai shaneng bad la pynïasoh lang ha ki plan jong ki Block, District, bad ki Jylla. Ka la bynrap ruh ba kine ki jingthmu ki ïahap bad ka Viksit Bharat National Infrastructure framework, kaba kynthup ïa ki kam kum ka jingpynbiang ïa ka um, ki jingdon jingem ba kongsan ha ki jaka nongkyndong, ki jingdon jingem kiba ïadei bad ka kamai kajih, bad ka jingkylla ka suiñbneng bad ka jingpynduna ïa ki jingjia lynshop ki bor ka mariang.
Ka la kren ruh shaphang ki kam pynsngewthuh ba la pynlong ha kylleng ka distrik ha ka Area Employment Council (AEC) bad Village Employment Council (VEC) ban pynsngewthuh ïa ki paidbah shaphang ki skhim jong ka sorkar, ki hok, bad ka jingdonkam ban ïashim bynta shitrhem ha ki rukom pynkhreh kam bad pyntreikam.
Ka Michelle C. H. Momin, District Mission Manager, NRLM, MSRLS, ka la kren shaphang ka bynta jong ka Ajeevika jong ka VB-GRAM G, da kaba ban jur kumno ki jingïarap kiba pynleit jingmut ha ka kamai kajih hapoh ka National Rural Livelihoods Mission (NRLM) ki pynkhlaiñ ïa ka ïoh ka kot ha ki jaka nongkyndong, ki kyntiew ïa ka jingseng kam la jong, bad ki pynthikna ïa ka jinglah ban pynmih ïa ki lad kamai jakpoh kiba ïaineh lyngba ki jaka treikam ba ïalam da ki longkmie, ki Self Help Group, bad ki kynhun ha ka imlang sahlang.
U Gopajit Das, Assistant Director, PIB Shillong, u la batai halor ka jingthmu jong ka prokram Vartalap bad u la ong ba ka Bureau ka la pynlong ïa kum kine ki sienjam ban ai jingtip ban pynsaphriang ïa ka jingtip shaphang ki prokram ba kongsan jong ka sorkar, kynthup ïa ka VB-GRAM G, bad ban pynsuk ïa ka jingïakren ba bniah hapdeng ka sorkar, ki lad pathai khubor bad ki nongshong shnong.
Ka jingïalang ka la ïarap ha ka jingïasam jingmut, ki jingai jingmut, bad ki rukom treikam kiba bha tam kiba ïadei bad ka ïohkam ïohjam ha ki jaka nongkyndong, ka kamai kajih, bad ka jingsynshar.
Ha kane ka prokram la ïashim bynta da ki nongmih khmat na ka Doordarshan, ka All India Radio (AIR), ka Directorate of Information and Public Relations (DIPR), ki lad pathai khubor, bad ki samla pule Master of Social Work (MSW), ICFAI University, Tura.
Ka PIB Shillong ka dang bteng ban pynlong ïa ki prokram ai jingtip ban pynphriang ïa ki jingtip shaphang ki sienjam ba kongsan jong ka sorkar bad ban kyntiew ïa ka jingïashim bynta jong ki paidbah kiba don ka jingtip ha ka jingïaid lynti ka ri sha ka roi ka par.