Shillong, Rymphang 09 : U Symbud Myntri Rangbah ka Jylla Bah Prestone Tynsong ha ka sngi Nyngkong u la ong ba ka sorkar jylla ka la ïakhun tyngeh ban tehlakam ïa ka jingtih dewïong beaiñ ha ka jylla.
“Ngi la dep ban bthah ïa ki bor distrik ba kin leh lut katba ki lah ban pyntikna ba ki kam beaiñ ki dei ban sangeh noh shi syndon,” ong u Symbud Myntri Rangbah haba kren bad ki lad pathai khubor ha ka sngi Nyngkong.
Halor ka jingkylli, u Bah Prestone u la ïathuh ruh ba haman ki jingjia kiba jia ka sorkar ka shim kam beit. “Kumta phi lah ban ïohi ha ki rekod ba ngi la pryshang ban leh ïa kaba bha tam bad mynta kane ka mih biang dang shen. Kumba phi tip hi kane ka jaka ba jia ka dei sha kyndong bha bad jynjar bha bad ka shimpor kumba 3-4 kynta ban poi sha ka jaka kata ruh lada ïaid da ki kali fourwheel, kumta phi sngewthuh ïa ki jingeh kaba wat ki bor pulit ruh ki shem jingeh bha. Kumta, kumba nga ong ngi la shimkhia bha ïa kane ka kam khamtam hadien kane ka jingjia,” u la bynrap bshuh shuh.
Da kaba kyntait ban ïathuh bniah namar ka kam ka la don ha Iingbishar, u Bah Prestone u la ong ruh ba ka sorkar jylla kan sa jubab sha High Court hapoh 10 sngi.
Haba ïadei bad ka jingbthei ha krem dewïong dang shen kaba la shim haduh 27 tylli ki mynsiem briew na ka liang u Bah Prestone u la pyntip ruh ba ka sorkar mardor ka la shimkhia ha kaba la ïoh ban kem arngut halor kane ka jingjia.
“Ngi la dep ban kem shwa arngut bad ki pulit mynta ruh ki dang bteng ban buddien ai ka kam ban lap katno ngut kiba donkti ha kane ka kam. Kumta ailad ïa ki pulit ba kin wad katno ngut don ki nongtih dewïong kiba donkti ha ka kam tih dewïong beain.”
Shuh shuh u la ong ruh, “Ngin dang bteng ban buddien khamtam ha kane ka aiom tlang ban pyntikna ba ki kam beaiñ ki dei ban sangeh.”
Halor ka jingkylli la ka sorkar kan pan jingïarap na ka sorkar pdeng ban phah ïa ki bor pahara ban ïakhun ïa kitei ki kam beain, u Symbud Myntri Rangbah u la ong ba ka jylla mynta ka dang ïakhun hi na ki bor pahara lajong tangba u ong pat ba shen kan sa pyndap noh ïa ki 3000 tylli ki kam pulit kiba thylli ha ka tnad.
“Nga kyrmen skhem ba hadien ba la dep kane ka jingthung kam, ngin sa lah ban tehlakam ïa kine baroh.”
