Ym pat klet ki paidbah ïa ka jingïap kiba trei par dewïong naduh u snem 2018 ha Rang Ksan ha ka por ba synshar ka NPP

Ngi im ha ka jylla, ha kaba ka synshar ka khadar, ka la ïap duh bad ïa kata ngi lah ban pynsakhi, ba haba saphriang ka video, ïa kiba tuh mobile na dukan, hana ki pulit ki leit beh sak sak bad leit kem bad wut bad wut, katba ïa ki jingjia kiba eh bad kiba ktah ïa u duk u rangli, lane ba la pynïaid da ki khraw bor khraw sor lane kita ki high level, ki pulit nongthwet mobile, ki shoh samthiah ngai ngai bad katei ka dei ka jinglong jingman ha kine ki sngi, ha kane ka jylla ba ieid jong ngi.
Haba jah u dewïong da ki 4 hajar metric ton sha East Jaiñtia Hills, u Myntri jong ka sorkar jylla, ha katei ka por, u aidaw ïa u slap bad katei ka dei ka jingkitkhlieh, kaba don ha ki nongïalam paidbah ha kine ki sngi.
Mynta ka la mih sa ka jingjia kaba la pynkyndit ïa ka India hi baroh kawei bad kaba ki bor jong ka East Jaiñtia hills District, kim lah shuh ban buhrieh (kumba ka la jia ha ki khyndiat taïew ba ladep, ha kaba la don kiba ïap ha katei hi kajuh ka thaiñ, na ka daw jong ka jingthang bom), lyngba ka jingïap jong ki palat phewngut ki nongbylla ha ka par dewïong ha Mynsngat jong ka thaiñ Thangskoo bad katei ka jingjia, ka la thad burom ïa ka synshar khadar jong ka jylla, ha kaba ka pyni shai, ba ka jingkhang dewïong naduh u snem 2014, ka dei pleng tang ka ktien tap eit miaw suda.
Ka jingkylli, kaba mih hangne, ka long ba ka bor jong ka aiñ, ka la ïap duh bad ym don shuh mano mano ba peit bad ba synshar, hynrei ka la dei noh ka jingsynshar riewkhlaw ha kaba uba donbor u leh katba u sngewbit bad sngewmon.
Kiba bun kim pat ïa klet, ïa ka jingïap ha ka par dewïong ha Rang Ksan, ha u snem 2018 bad ha ka por jong kane hi ka sorkar NPP, ha kaba la antad, ba kin poi sha ka 15 ngut eiei bad katei kam dei tang kawei ka jingjia, hynrei ki don shibun bah kiwei de ki jingjia, ki bym lah ñiew shuh, ha kaba wat ka tnat jong ka sorkar India, ka ED ka la thad madan ïa kine ki kam tuh ba triem bad ba shyrkhei haduh katta katta.
Kiba bun bah ki mynsiem briew, ki la shu duh ei khamakha, ha ka jingsynjor ka synshar khadar ha ka jylla bad ka jingkheiñ kam dei shuh kaba rit, na ka jingduh ki mynsiem briew; hynrei u don tang uwei u dak jingkylli bad uta u long, mano sha ban kitkhlieh halor ka jingïap jong ki mynsiem ba lui lui ha kitei ki par dewiong?.
Kaba pynlyngngoh shuh shuh ka long ba u Myntri Rangbah ka jylla u Conrad Sangma u la da kloi sohsat ban kren sha ki lad pathai khubor ban pynrem ïa kane ka jingjia bad ha kajuh ka por ban pynpaw ïa ka jingsngewlem ïa kito ki longïing longsem kiba la duh noh ïa kiba ieid ba thoiñ kiba la khlad noh na ka jingjia shah tyllep hapoh ka krem dewïong na ka daw jong ka jingpynbthei bom dynamite ha katei ka par dewïong beaiñ ha katei ka district.
Kaba sngew thamula shuh shuh ka long ba ka sorkar jylla ruh lyngba u Myntri Rangbah ka la da kloi mar mar ban tap eit miaw ïa katei ka jingjia da kaba pynbna ban ai bai lutksan ïa ki bahaïing hasem kumba mar T. Lai lak khlem pat da wad bniah bha la kitei kiba la khlad kidei shisha ne em ki nongshong shnong ka ri India ne ki nongshong shnong bapura jong ka jylla Meghalaya.
Ngi la ïohi ruh ba na ka por sha ka por ka Ïingkashari Meghalaya High court ka la pynmih lah bunsien ki hukum ban kem bad ban khangdam bad ban pynduh jait ïa kane ka kam tih dewïong beaiñ ha ka thaiñ East Jaiñtia Hills District, hynrei na ka liang jong ki pulit pat namarba imat ba ki khlem ïoh bor ne ïoh ba ka don kaei kaei kaba sha lyndet, kumta kim kohnguh shuh wat ïa ka hukum ka Ïingkashari Meghalaya High court.
Kumta ha kane ka kynti ngin hap ban ïa peit kumno ka Sorkar kan leh, la kan nud ne em ban thad madan ïa kiba donkti ban tih dewïong beaiñ ha katei ka thaiñ, kumba la pynpaw da u Myntri Rangbah ba kiba leh beaiñ kin ym lah ban lait na ki kti jong ka aiñ.
Shuh shuh halor kane, na ka liang kiba bun ruh na ki sengbhalang ki la dawa ba dei ban aiti noh sha ka CBI ba kan tohkit halor kane ka jingjia bad kumjuh ruh ki la ai jingmut ïa ka sorkar ba dei ban pynthikna shwa ïa ki nongbylla kiba mad ïa kane ka jingjia, la ki dei shisha ne em ki nongshong shnong ka ri India ne jong ka jylla Meghalaya ha shwa ba kan aiti ïa ka pisa bai lutksan sha ki longïing kiba la mad ïa kane ka jingjia kaba sngewsih.