Sdang kylla pisa ka projek thung tit ha Nongkseh, kyrpad ban sdang noh ïa ka Phase -2

Shillong, Rymphang 08 : Ka projek thung tit ha ka Khasi Jaintia kaba sdang ha Nongkseh ba la tip kum ka Nongkseh Mushroom Cultivation Village Pilot Project lyngba ka jingbei tyngka da u Myntri Rangbah ka Jylla Conrad K Sangma ka la sdang ban sei ïa u soh ka jingkyrmen bad wanrah ruh ka jingphuh samrkhie.
Lyngba kane projek la mang ba kin don haduh 200 tylli ki longiing ban don bynta hynrei ïa mynta ki la sdang shwa da ki 30 Ïing ha ka kylla kaba nyngkong.
Kum ka jingbuddien ïa kane ka projek na ka liang ka Dorbar Shnong Nongkseh hapoh ka jingïalam jong u Bah Myrank Thangkhiew, Bah Daniel Thangkhiew, nangta u Basan ka Nongkseh nalor ka Director barim ka tnad ka rep ka riang Kong B Mylliemumlong, ha ka sngi Saitjain ki la pynlong ka jingjurip ïa kine ki jaka rep tit.
Ha ka jingïakren bad kine ki nongïoh jingmyntoi ki la ïathuh ba kane ka projek ka la ai ka jingkyrmen ïa ki ba kin ïoh kamai da kane ka kam kaba thymmai kaba ym da bam ïa ka por bad ka bor kumba long kiwei pat ki mar rep.
Na ka liang u Bah Teibor Thangkhiew bad Kong Quency Thangkhiew kiba dei ki nongrep tit ki la ïathuh ba kane ka kam ka la ai jingkyrmen ïa kiba bun ki longiing. Ha kajuh ka por ki la kyrpad ïa u Myntri Rangbah ban pynïoh sa ïa ka cold storage kumjuh ïa ki mashin thad rkhiang ïa u tit namar ka dor u tit tyrkhong ka kham heh bad kham bun ka jingdawa.
Na ka liang u Rangbah Shnong u la pynpaw ka jingsngewnguh ïa u Myntri Rangbah bad baroh kiba don bynta ban pynurlong ïa kane ka projek kaba don ka jingkyrmen ban pynkylla dur ïa ka kamai kajih jong ki nongshong shnong ka thain.
“Da ka jingsngewshlur ngi la pdiang ïa kane ka pilot project bad dei da ka jingai mynsiem jong u Myntri Rangbah ngi la sdang ïa kane ka kam. Lyngba ka jingkyrshan jong ka sorkar ki nongrep ki la trei shitom ïa ka kam bad dei ha u Nohprah 2025 ki la sdang ban thung nyngkong ïa une u tit bad dei ha u bnai Kyllalyngkot mynta u snem ba ki la sdang ban ïoh kheit,” la ïathuh u Rangbah Shnong, Bah Myrank Thangkhiew.
U Rangbah Shnong u la ïathuh ruh ba ka jingseisoh jong kane ka projek ka la pynlong ïa kiwei pat ki nongshong shnong ba kin kwah ban sdang noh sa ïa ka kylla kaba ar jong kane ka projek.
“Mynta ki nongshong shnong ki la khih mynsiem bad kwah ban sdang noh ïa ka kylla kaba nyngkong khamtam haba ki ïohi ba ha ka kylla kaba nyngkong ki para nongshong shnong ki la ïoh ban kheit bad ïoh ruh ban die,” u la ong.
U Rangbah Shnong u ong ruh ba kane ka projek ym tang ba ka wanrah ka jingkyrmen ha ka kamai kajih hynrei ka wanrah ka jingïatylli hapdeng ki nongshong shnong ban kyntiew shuh shuh ïa ka kam.
Lah ban kdew hangne ba nalor ka Mendipathar Mushroom project ha rilum Garo, ka projek rep tit ha Nongkseh kadei kaba nyngkong ban sdang kum ka pilot projek ha rilum Khasi Jaintia.