Ai jingmut ka komiti u Justice Katakey ban pynkylla jaka jngohkai ïa ki jaka tih dewïong

Shillong, Rymphang 8 : Ka Committee ba la thung da ka ïing Bishar High Court jongka jylla kaba la khlieh da u Nongbishar ba la shongthait u Justice BP Katakey ka la bthah ïa ka sorkar jylla ban pdiang ïa ki jingtyrwa ban thaw lad ban pynbha ïa ka um ba la kylla Acid bad ban thaw ïa ka Acid Mine Drainage ha ki lai tylli ki shnong bad ha kajuh ka por ban pynkylla ïa ki jaka ba la tih dewiong sha ki jaka jngohkai pyrthei ha East Jaintia Hills.
ïa ka kaiphod bad jingtyrwa la dep aiti sha u Deputy Commissioner na ka bynta ka Acid Mine Drainage ha ka shnong Rangad, Moolamanoh bad Iongkaluh ha ka jinglut kaba palat 15.84 klur tyngka bad ban shna pynbha ïa ka kshaid ha Moostem bad ka Park ha Sutnga ha ka jinglut ba 4.25 klur tyngka.
La ai jingmut ïa kane ka kam lah ruh ban leh da ka tnad Mining and Geology jongka sorkar jylla ne lah ban phah sha ka Oversight Committee namar kane ka lah pat ban aibor ban pynlut na ka Meghalaya Environment Protection and Restoration Fund (MEPRF).
Ha kawei pat ka liang ka Committee jong u Justice Katakey ka la dep ban aiti ïa ka kaiphod ba 35 sha ka ïing bishar High Court na ka bynta ban khang bad btep ïa baroh ki krem dewiong ha ka jylla Meghalaya.
Ha ka kaiphod la pynpaw ruh ba ka kaiphod ba la aiti da ka CMPDIL ka dang sahkut ha ka ophis Directorate of Mineral Resources ha kaba ïadei bad ka jingpan jingmut halor kane ka jingbtep ïa ki krem dewiong. La ïathuh ba ïa ka Detail Project Report ruh dang sdang ban pynkhreh kat haduh mynta.
Ka jingpynlut na ka bynta ki ar tylli ki jaka ban sdang ka jingbtep khyndew kaba long kum ka jingsdang bad kum ka nuksa ne kata ka Pilot Projek kan long kumba 11.68 klur tyngka.
Tang ha East Jaintia Hills ki don palat 22,000 tylli ki krem bad ka Committee ka ai jingmut ban thaw da kiwei ki lad ki lynti kumno ban btep ïa kine ki krem ha ka jinglut kaba duna bha.
Halor kane ka Committee ka hukum ïa ka tnad Directorate of Mineral Resources ban ai jingtip kaba bniah halor kane hapoh 10 sngi bad kumjuh ruh na ka ophis jong u Deputy Commissioner ka East Jaintia Hills ban ai sa kiwei ki jingai jingmut da kaba ïatrei lang bad ki Rangbah Shnong bad ki paid Nongshong shnong halor kane ka juh ka kam hapoh 30 sngi.
Ka Committee ka sngewthikna ba kin don da kiwei kiwei ruh ki lad ki lynti ban btep ïa kine ki par tih dewiong ha ka dor kaba tad bad ba lah ruh ban pyndep kloi.