Kiew ka jingïap bthei bom ha krem dewïong sha ka 25 ngut

Shillong, Rymphang 6 : Ki kynhun ai jingïarap ban wad ia ki metiap kiba don shapoh krem dewiong mynta ka Sngi Thohdieng ki la ïoh sei sa 7 tylli ki metiap ha ka jingjia bthei bomb dynamite ha ka par tih dewiong beaiñ ha Mynsngat, Thangsko, East Jaintia Hills.Mynta ka jingiap jong ki nongbylla na kane ka jingjia, ka la kiew sha ka 25 ngut baroh lang.
Ka Director General of Police Kong I Nongrang ka ïathuh ba 12 ngut na ki 25 ngut ba la lap ïa ka metiap, ki dei kiba la lah ban pynithuh.
“Ka jingwad ka dang ïaid shaid shaid mynta bad ka kynhun ai jingñarap NDRF, SDRF, SRT namar kine ki dang pyrshang katba lah ban lap ïa kiwei pat ki lanot bad ban pyndep ïa ka jingithuh kham kloi kat kaba lah” kala bynrap.Ka Sorkar kala buh ruh ïa ka kynhun ki doktor bad ambulance ha katei ka jaka.
La buh pynap ruh ïa ki Shipai Ryngkew bad Shipai Suiñ lada donkam ïa ka jingïarap jongki halor kane ka jingjia.
Ha kaba ïadei bad kane ka jingjia bthei bom dynamite ki pulit ki la kem ïa arngut ki trai par tih dewiong beaiñ ha Thangsko, East Jaintia Hills, kaba la shim ïa ka mynsiem ki 25 ngut ki nongbylla.
“Ngi la kem ia arngut ki briew ba ïadei bad kane ka jingjia” ong u Superintendent of Police Vikash Kumar ha ka sngi Thohdieng.
Ula kular ba ki Pulit kin thwet tyngeh ban ïohkem ïa baroh ki briew kiba don bynta ha kane ka jingjia.
Kane ka jingjia kala jia ha Mynsngat, Thangsko, kaba hap hapoh ka Umpleng Police Outpost, ha ka sngi Palei ka 5 tarik Kyllalyngkot.
Haduh 25 tylli ki metiap lah ïoh ban sei na kane ka par ba bthei bomb.7 ngut ki briew ki la mynsaw bad la pynkit sha hospital ha Shillong ban ai jingsumar ba paka.
(Na jaka ba jia da I Correspondent jong ngi Kong H Lyngdoh Tron) Ki shipai pyllait im kiba don ha kane ka par dewïong mynta ka sngi ha ka por kumba 1.30 ki la lah ban sei sa kawei ka met bad ha ka por jamniet pat ki sei sa ïa kiwei pat ki metiap.
Ki ar ngut ki myntri ka sorkar jylla, u bah Lakmen Rymbui bad u bah Wailadmiki Shylla lem bad ka MLA jong ka Sutnga Saipung ka kong Santa Mary Shylla ki la poi sha katei ka jaka ba jia ka jingbthei bom dynamite hynnin ka sngi.
Kat haduh mynta ki shipai pyllait im ba kynthup na ka National Disaster Response Force, ka State Disaster Response Force ka Special Rescue Team, Border Security Force (BSF) ki dang bteng ïa ka jingwad ïa ki briew kiba dang sahkut shapoh ki krem dewïong, ha katei ka jaka ha Mynsngat la don ruh u ADC ka East Jaiñtia Hills District, u bah C.P.Mawkon, u BDO Saipung C&RD Block, u Dr R.Pyrtuh, ki shipai ïada khappud kiba na Umkiang Border Outpost, ki pulit lem, bad kiwei kiwei ki heh sorkar kiba na East Jaiñtia Hills District, la ïa don lang ruh ki ba ha ïing ha sem jong ki lanot kiba dang sahkut shapoh ki krem dewïong.
Kiba mynsaw ki dei kiba tip kyrteng kum u Shanki Shylla, 35 snem kyrta uba na Khliehriat, u Deb Malakar,25 snem kyrta uba na Assam, Korna, 46 snem uba na Nepal, Lalit Magar, 40 snem kyrta na Nepal, Jamil Ahmed, 36 snem kyrta na Hailakandi Assam, u Nor Bahadur, 35 snem na Nepal kine ki hynniew ngut mynta ki dang shah sumar ha NEIGRIMS Hospital Shillong bad uwei uba la rah sha Ialong Civil Hospital Jowai ym pat ioh kyrteng