Ailad u Myntri Rangbah ïa ki paidbah ban ïashimbynta ha ka jingpynkhreh ïa ka mang tyngka

Shillong, Rymphang 6 : U Myntri Rangbah ka Jylla u Conrad K Sangma ha ka sngi Thohdieng, ula ailad ïa ki paid nongshong shnong ba kin ïashimbynta shitrhem ban ïadon bynta lang ha ka jingpynkhreh ïa ka mang tyngka jong ka Jylla.
U Conrad ula pynpaw ïa kane haba pynïaid ïa ka jingïalang syllok halor ka mang tyngka (pre-budget consultation) na ka bynta u snem mang tyngka 2026-27.
U Conrad ula ïakren bad ki nongïashim bynta ba kynthup ïa ki stad kot, ki economist, ki seng bhalang, ki seng ki nongrep, ki Ophisar Sorkar bad ki nongthoh khubor, da kaba jubab ïa ki jingkylli bad ki jingai jingmut halor ka mang tyngka, ka pule dangle, ka sap treikam, ka sengkam sengjam, ka kam jngohkai bad ki kam pynroi bapher bapher.
ïa ki jingïakren baroh la buh jingthoh da ka Tnad Finance ba kan shong bishar bad leh ïa kaba donkam ha ka jingpynkhreh ban wanrah ia ka mang tyngka hapoh ka ïing Dorbar Thawaiñ ka jylla.
Ki jingai jingmut jong ki riew paidbah lyngba ki kor online ruh la ïakren ha kane ka jingïalang. Lah ban kdew ba ka Dorbar Mang tyngka jong ka Jylla kan sdang naduh ka 16 tarik Rymphang haduh ka 27 tarik.
U Conrad ula ïathuh ïa ki jingjop jong ka Jylla ha ki kam bapher bapher ha kine ki phra snem ban wan, haba pyntip ïa ka kyrdan jong ka Jylla kum ka Jylla ba wan ba-ar napdeng kiwei pat ki Jylla ha ka jingkiew sted ka GSDP, hadien jong ka Tamil Nadu.
Haba batai ïa ka pla tyngka ka Jylla, la pynpaw ba ka Meghalaya ka dei tang ma ka na ki Jylla hapoh ka ri ban kot ïa ka jingkiew ka GSDP ba 10% ha kine ki laisnem lynter hadien ka COVID.
Ka jingpynlut baroh lang ka la kiew palat ïa ka lai shah, ka jingshakri paidbah kala kham bha, ki project jingtei ba kongsan ki la ïaid nalor ka jingplie lynti bha ïa ki paidbah.
Ka jinglah pyntreikam bha ka Jylla ïa ka skhim hapoh ka Special Assistance to States for Capital Investment (SASCI), kaba tyrwa 50 snem ka ram ba khlem sut, kaba long kum ka grant, ka la pynlah shibun shah ïa ka jingpynkha ïa ki nongkynti, kaba la ailad ruh ïa ka Meghalaya ban nang ïoh kham bun ïa ka song pisa na kane ka prokram.
Ka Externally Aided Projects (EAPs) ka la kyrshan ïa kiba bun ki prokram ba lamkhmat da ki nongshongshnong kynthup ïa ka MeghLAMP, MeghARISE, bad ka Climate Adaptive Community Based Water Harvesting Project.