Pynlong jaka ïakynduh ban khaïi drug ki samla ba wan leh detox ha Civil Hospital

Shillong, Rymphang 6: Ka Khasi Student Union (KSU) Laban Circle da ka jingsngewkhia ïa ka jingshngain ha ka ïaid ka ïeng ki paidbah nong shong ka Laban, mynta ka sngi kila leit ban ïa kynduh ïa ka Surgent Superitendent jong ka Shillong Civil Hospital.
Kane ka jingleit ban kynduh ka KSU ïa ka Superitendent ka long ha kaba ïadei bad ki khynnah kiba wan shim dawai ne detox, ha kaba kila pyndonkam ïa ka lynti ïaid kjat jong ka Civil Hospital shaduh shajan Red Cross ban shongkai bad dih ïa ki jingdih ba sniew.
Haba kren sha ki lad pathai khubor u Samla Jason C Laloo uba dei u President ka Laban Circle u la ong ba la bunsien kila ïoh pdiang ka jingujor na ki paidbah bad kine ki khynah bunsien ki ai daw ba ki wan bamja ne thied jingthied.
“Ha kine ki bnai ba la dep ngi lap ba ki don bun ki khynnah kiba wan shong bad ha khamt ki paidbah kine ki khynnah ki ïakhleh kynja ha ryngkat ka dih biri, sikret bad dih kynja bad kane ka pyn-i-said met bad kiba bun ki paidbah na Laban kila shah lute man ka por” ong u samla Jason.
Shuh shuh u samla Jason u la ong, Ha kine ki taiew ba la dep la don u wei u rangbah bah ba ?ïaid na kane ka jaka ka jingdon ki kynthei bad katto katne ki samla kila bat ïa une u rangbah ha kaba kila dawa pisa bad lada une u rangbah um treh ai kin pyrshang ban hala u leh ki kam ba kumne kumtai ïa ki kynthei briew bad da ka jingsheptieng une u rangbah u la ai katba u don.
“Hapdeng jong ki, hooid ki don kiba kwah shisha ban kylla hynrei ki don pat ki samla kiba wan shim kabu ïa kane ka jaka ban pynlong kum ka jaka ïa khaïi ne ka jaka ban ïa kynduh ban suh buit kumno ban khaïi ia une u drug ha kylleng ka sorkar Shillong baroh kawei” u la ong.
Na ka liang jong ka seng kala pynpaw ba mynta ka sngi ki wan da ka lynti ba jai jai ban kynduh ïa u Superitendent ban bthah ïa u ban shim khia ha kaba ïadei bad kine ki khynnah ba tang hadien ba kila dep shim dawai kim dei shuh ban shongkai ha kine ki footpath bad khamtam eh ha u Mot Kiang Nangbah.
Ka khubor na ka seng, u samla Jason u la kyrpad ïa kine ki samla ba kim dei ban ïeng ne pynlong ka jaka ban dih drug bad khaïi drug ne kynja bad lada kine ki samla ki patiaw ne leh bym suidniew ka seng kam banse ban shim ïa ka ain ha kti lajong.