Ha ki snem ba la leit kam ju don ka sawdong sawkun ban kyrshan ïa kiba sengkam lajong ha jylla, ong u Conrad

Shillong, Rymphang 05: Ka PRIME Meghalaya jong ka sorkar jylla ka la pynlong ïa ka prokram ha ka sngi Palei hapoh Ward’s Lake, Shillong ha kaba ha kane ka prokram la wan ban shim bynta da u Myntri Rangbah ka jylla u Conrad K Sangma, kum u kongsan.
Kane ka prokram ka rakhe ïa ka jingshah jied jong ki 75 ngut kiba sengkam lajong (Startup) kiba la shah jied lyngba ka Chief Minister’s E-Championship Challenge 6.0 katba ki dang sdang ïa ka jingsdang ka kam jong ki lyngba ka jingïaid lynti bad kumjuh ruh ban rakhe ïa ka jingpoi ha ka kyrdan graduate jong ki 75 tylli ki Startup jong ka Cohort 5 halor ki jingjop bad jingaiti jong ki ha ka kam lajong ba ki trei.
Haba kren ha ka jingïalang, U Myntri Rangbah u Conrad K Sangma, u la ong ba kiba sengkam lajong ki lah ban trei ki kam ba phylla na ka bynta ka jylla bad ka ri da kaba bynrap, “Nga la kren bad kiba sengkam lajong ha kiba bun ki bynta bad don ki por ba nga duh ki kyntien hynrei kaei kaba ym pynkylla ïa nga ka dei ka jingngeit bad ka jingshitrhem na ka bynta kiba sengkam lajong bad ki jingmyntoi kiba bun na kane ka jingshitrhem.”
U la bynrap ba ha ki snem ba la leit kam shym don ka sawdong sawkun ha Meghalaya ban kyrshan ïa kiba sengkam lajong hynrei mynta wat ka sorkar India ka la ithuh ïa ki prokram sengkam lajong jong ka jylla lyngba ki jingsam ïa ki khusnam bad ki jingïaroh.
Haba sam ia ki jingshem jingmad jong u kum u nongsengkam uba la khih la ksar ha shwa ba un pynïasoh sha ka kam saiñ hima sima u Myntri Rangbah u la ong, “Nga lah ban pynïasoh bad pynïadei bad ki jingsngew khuslai, jingtieng jong phi, ki jingduh jingkyrmen bad ki jingeh ba phi mad hynrei nga ïohi ïa kajuh ka jingthaba ha ki khmat jong phi bad ka sorkar kan leh ïa kaba bha tam ban kyrshan ïa ki jingïaid lynti jong phi sha ka kam sengkam lajong.” Haba ong ba ka jingsengkam lajong ka long kaba hap ban ïakhun u la bynrap, “La thaw ïa ka PRIME ban ïalam lynti ïa phi ban ïaid lyngba kine ki jingïaleh.”
Haba kynthoh halor ka Chief Minister’s E-Championship Challenge u la ong ba nalor ki jingai jingkyrshan bad ban tei ïa ki jingsdang jong kiba sengkam lajong ka donkam ruh ka jingai jingithuh bad ka jingai khusnam na ka bynta jong ki.
Ka khubor jong u sha kiba sengkam lajong, u Myntri Rangbah u la ong ba kim dei ban pdiang ïa ki jingshah jop ne shah rem ne ban shah pynduh jingkyrmen hakhmat ka khmat jong ka jingpulom. “Ïaid shakhmat wat hapdeng ki jingeh bad kmen ïa kine ki khyllipmat jong ki jingïakhun naba hadien habud haba phi phai dien biang kine ki jingïaid lynti ba phi mad kin sa batai shaphang jong phi,” u la ong.
Katba u Commissioner & Secretary, u Dr Vijay Kumar D, u la ong ba ka jingeh kaba khraw bad ka bynta kaba sngewkwah eh ka dei ka jingkiew ki kam sengkam lajong naba ka jylla Meghalaya kam dei ka madan kaba jem na ka bynta kiba sengkam lajong namar ka jingjngai na ki ïew ba ju long hynrei u la bynrap ba da ka jingïaishah bad ki jingshem thymmai ka jylla mynta ka la ïaid sha ka lynti ka sengkam lajong
Ha kane ka sngi u Myntri Rangbah u la pyllait ruh ïa ka PRIME Entrepreneur Catalogue bad ai khusnam ruh ïa ki nongsengkam kiba pawbha (Top Performers) ha ki Incubation Program ha ki kyrdan bapher bapher bad pynkup burom ruh ïa ki graduate start up ka Cohort 5 bad Cohort 6 ha kane ka prokram.