Nongstoiñ Rymphang 05: Na ka bynta ban pynneh pynsah ïa ka riti ka dustur ba la leh da ki long shuwa ka synjuk ki samla ka thaiñ Muliang kaba la tip kum ka Ge Thymmei U Muliang kaba la lam khmat da u samla Pynshai Joel Dkhar ka la pynlong ïa ka Rynsan ïapynisap ha ka rwai ka siaw, ka shet ka tiew, ka phawar da ki sur tynrai bad ka suh ka thaiñ ïa ki jaiñ bad ki pla ba la ju tip kum ki ‘pla muliang’.
Ïa katei ka rynsan pynisap la pynlong ha madan shnong Tynghor ha kaba ki samla na kylleng ki shnong kiba don ha ka thaiñ Muliang ki la wan ban ïa shim bynta bad kumjuh ruh ki longkmie long kpa na ki shnong ba marjan kum na Mawmareh, Tynghor, Domjaraiñ bad kiwei kiwei ki shnong ki la wan ban ïashim bynta ban shet ïa ki jingbam tynrai bad ban thaiñ ïa ki ‘pla muliang’.
U samla Pynshai haba ïakren bad ki lad pathai khubor u la ong ba ka jingpynlong ïa katei ka rynsan ka long ban pynim biang ïa ka Riti ka dustur ba ki long shuwa man shuwa kiba la ïalam bad ban pynkynmaw ruh ïa ki jingeh ba ki long shuwa ki ïakynduh.
Nalor kata u la ong ba katei ka rynsan ka dang dei tang ka jingsdang bad kum ki nongïalam jong ka synjuk ki don ïa ka thong ba ha kiwei pat ki por kin sa pynlong shuh shuh da ka rynsan kaba kham heh bad kin sa khot lang ruh ïa ki nongshong shnong na kylleng ki jaka ba kin wan ban ïashim bynta lang.
Ha katei ka sngi la pynshong shit bad pynphuh pynphieng da ki nongrwai marwei, nongrwai kynhun bad ki nongshad kiba bun rukom.Ha kaba ïadei bad ka suh ka thaiñ na ka liang ki lonkmie ki la ïa shim bynta shit rhem da kaba thaiñ ïa kip la tang da ki tiar thaiñ ba ki shna hi ha shnong la jong.
Haba kylli na ki longkmie ba ïa ki ksai ban thaiñ ki pynmih hi ne ki shu thied ki la ong ba ki don ar jait ki ksai kiba shu thied na Assam bad kiba pynmih hi.Ki la ong ruh ba ki ksai ba pynmih hi ki kham eh ban thaiñ katba ki ksai ba thied na Assam pat ki kham jem bad kham suk ban thaiñ.
Nalor kata ki la ong ruh ba katei ka kam ban thaiñ ïa ki pla ka dei kawei na ki kam kiba ai jingmyntoi ha kaba kyrshan ïa ka ïng ka sem da kaba die bad pynïaid ïew ha kylleng ki jaka.
