Da ka prokram kyrpang ban khreh eksam pynmih ka bor district Ri-Bhoi na bynta ki samla wadkam sorkar

Nongpoh, Rymphang 05: Ka ophis jong u Deputy Commissioner ka Ri-Bhoi District ryngkat ka jingïatreilang bad ka filo kala pynmih ïa kawei ka prokram kyrpang naka bynta ki samla wadkam sorkar bad kiba dang pynkhreh ïaki eksam kaba la tip kum ka App Based Coaching for Government Job Aspirants naka bynta ki samla kiba la pyndep ïaka klas 12 naka bynta ki kam sorkar bapher bapher haka jylla bad kumjuh ruh ha sorkar pdeng.
Haba kren sha ki lad pathai khubor naka liang u Abhilash Baranwal Deputy Commissioner ka Ri-Bhoi District ryngkat u Bah Eric K Dkhar Additional Deputy Commissioner ka Ri-Bhoi kila pyntip ba kane prokram ka dei kaba kyrpang sha ki samla wad kam kiba la pyndep ïaka Class 12 bad ïakane ka prokram la rai ban sdang naduh u bnai Lber 2026 ha kaba ka bai register kan long 500 tyngkat uwei u samla wad kam hynrei la bhah kyrpang ïaki samla na Ri-Bhoi District ha kaba 400 tyngka yn kyrshan da ka sorkar katba 100 tyngka ka dei kaba ki samla wadkam ki hap ban siew khnang ba kin shimkhia ïaka jinghikai lyngba katei ka prokram.
Kial pyntip ruh ba ki samla wad kam kiba kwah ban pynrung kyrteng ïalade ha katei ka prokram ki lah ban leit lyngba ka link https://tinyurl.com/25c5rwpc ha kaba kin sa don shibun ki prokram naduh ki live classes ba ki samla wadkam ki lah ban shong ïaki klas bad lada kim lap por ki lah ruh ban peit da ki klas bala dep record lypa.
Naka liang kitei ki heh ophisar ka district kila ong ruh ba ka thong jong ka bor district ban shim ïa kane ka sienjam ka long ban plielad ïaki samla wadkam ka district ba kin shut ïala ki jabieng namar la lap bunsien ba ki samla ki biang haka English, ka General Knowledge hynrei ki duna bha haka kaba ïadei bad ka Mathematics bad Reasoning, kumta kila kyrpad ruh ïaki samla wadkam ba kin shim ïa kane ka kabu ban pynkhreh ïalade naka bynta ki kam sorkar bapher bapher kiba lait haka district, haka jylla bad kumjuh ruh ki post jong ka sorkar pdeng.