Kyntu ka CBCI ïa u Modi ban pynrem paidbah halor ka jingshah thombor ki Khristan hapoh ka ri

Shillong, Rymphang 05: Ka Catholic Bishops’ Conference of India (CBCI) ka la kyntu ïa u Myntri Rangbahduh ka ri u Narendra Modi ba u dei ban pynrem paidbah ïa ka jingshah thombor ki Khristan bad ba u dei ban shim ka sienjam kaba skhem ban ïada ïa ki hok jong ki niam rit paid bad banjur ïa ka jingdonkam ban ai ka jingïada bad jingshngaiñ katkum ka riti synshar ka ri bad ki jinglait luid jong ka naba kane kadei ka jingkitkhlieh ba dei ban shim da ka sorkar.
Haba kren ha shwa ban pynlong ïa ka 37th CBCI General Body Meeting ha Bengaluru, u Archbishop Andrews Thazhath, President jong ka CBCI, u la pynpaw ka jingsngewkhia kaba khraw halor ki jingïai jia ki jingshah thombor bad ki jingshah ktah kti pyrshah ïa ki Khristan ha ki bynta bapher bapher jong ka ri.
U la ong ba haba don kum kine ki jingjia, ka Balang barabor ka ju leit kynduh ïa ki bor ba dei peit lyngba ki jingïakren bad ki jingthmu kiba suk ba saiñ, khlem da pynphai kylla ïa kino kino ki jingïaleh pyrshah.
U Archbishop Thazhath u la kdew ba kum kine ki jingshah thombor ki dei barabor na ki kynhun kiba la leh palat bad banjur ba lada ka long kumta, kum kine ki jingjia dei ban pynrem da kaba shai bad ba dei ban wanrah hapoh ka jinglah ban tehlakam.
U la ïathuh ruh ba dalade hi shimet u la rah ïa kine ki jingsngewkhia bad u Myntri Rangbahduh ka ri ha kiba bun ki bynta, kynthup ïa ka jingwan ïa shim bynta jonuu Myntri Rangbahduh ka ri ha ka jingrakhe Christmas ba dangshen. Haba banjur ba kine ki jingsngewkhia jong ka Balang kam dei kaba don bynta ha ka kam saiñ pyrthei, u la ong ba ïa ki Khristan la thombor shai kdar halor ka nongrim jong ka niam, kaba la pynmih ïa ki jingsngew tieng bad ka jingbym shngaiñ hapdeng ki kynhun.
Haba pynskhem ba ka jingjubab jong ki Khristan ka don nongrim ha ka jingngeit bad ka jingbym ïaumsnam, u Archbishop u la ong ba ka Balang ka bud ïa ki jinghikai u Jisu Khrist, uba khot ïa ki nongbud jong u ban ieid wat ïa la ki nongshun. U la pynpaw ruh ïa ki jingnoh synniang ba la slem bha jong ki Khristan na ka bynta ban tei ïa ka India, ha kajuh ka por ruh u la pynpaw ka jingsngewsih ba hapdeng kine ki jingnoh synniang dang ïai jia bun ki jingshah ban beiñ bad shah thombor ïa ki Khristan.
Ha kane ka jingkren la donlang u CBCI Secretary General u Archbishop Anil J.T. Couto, Vice-President II Bishop Joseph Mar Thomas, Deputy Secretary General Fr. Mathew Koyickal, bad CBCI PRO Fr. Robinson Rodrigues.
Ha kawei ka liang ki nongïalam ka CBCI ki khot ïa baroh ki riewngeit ba kin bteng ban duwai na ka bynta ka jingsuk, ka jingïoh ka jingbishar hok bad ka jingïasngew shipara, bad ba ka ri ban neh ha ka jingïohi jngai jong ka riti synshar bad ka jinglaitluid jong baroh.