Bthah ka Committee u Justice Katakey ban pynpra 33 tylli ki karkhana Coke ha EJH bad WKH

Shillong, Rymphang 4 : Ka Committee ba la khlieh da u Nongbishar ba la shongthait u Justice BP Katakey ka la hukum ïa ka sorkar ban pyllait noh mardor ïa ka pisa na ka bynta ban pynpra ïa ki 33 tylli ki karkhana coke ha East Jaintia Hills bad West Jaintia Hills District.
Ka Committee ka la hukum ïa ki bor District ka EJH bad WKH ba kin pynpra ïa ki 16 tylli ki karkhana coke ha EJH bad ïa ki bor District ka West Khasi Hills ban pynpra ïa ki 17 tylli ki karkhana coke ha WKH, haba pynpaw ba ka jingdon jongki ki lah ban pynmih mar sopsop.
“Ka Committee kala ai jingmut ban pyllait noh mardor ïa ka pisa ba donkam sha ki bor District ka EJH bad WKH ba kin pynpra ïa kine ki karkhana coke bad ba kin leh ïa kane kam mar syn ïoh ïa ka pisa khnang ba kan nym don ka jingpynmih mar sop sop” ong u Justice Katakey ha ka kaiphod ba 34 ba la aiti sha ka ïing Bishar High Court jongka jylla.
“Ki Deputy Commissioner bad Superintendent of Police jong kine ki District ki dei ban pynthikna ba kine ki karkhana kim dei ban treikam shuh tad haduh ban da dep pynpra” ong ka kaiphod.
Ka Committee ka la hukum ruh ïa u Deputy Commissoner ka EJH ba un pynpra ïa ki 16 tylli ki karkhana coke hapoh ka artaiew ba ïoh pdiang ïa ka pisa bad ban aiti ruh ïa ka kaiphod.
La bthah ïa ka DMR, Meghalaya, Shillong ba kan ai mardor ïa ka pisa ba donkam na ka bynta ban pynpra ïa kine ki karkhana.
Kane ka sienjam ka long kat kum ka hukum ka ïing Bishar Supreme Court kaba 25 tarik Naiwieng, 2024, ha ka Writ Petition (Civil) No. 720/2023 [Druk Fuel Limited -Vs- The State of Meghalaya and Others].
Kat kum ka kaiphod, lah kheiñ antad ba donkam ïa ka pisa ba 42,50,000 tyngka ban pynpra ïa ki 17 tylli ki karkhana coke ha West Khasi Hills.