Pyrshah ki draibar Taksi ban pyndait da ka tracking devices ha ki taksi ba kamai hapoh ka district

Shillong, K’Lyngkot 4: Da ka jingsngewkhia ïa ki draibar kali bad kumjuh ruh ïa ki trai kiba duna ha ka ïoh ka kot, ki nongïalam ka East Khasi Hills Local Taxi Welfare Association (EKHLTWA) kila kynduh ïa u Symbud Myntri Rangbah u Bah Sniawbhalang Dhar ban pynpaw ka jingpyrshah ban pyndait ïa ki Vehicle Location Tracking devices kiba kamai tang hapoh ka District.
Ha ka jingïa kynduh ïa u symbud myntri rangbah uba peit ïa ka tnad transport, ki nongïalam ka EKHLTWA ki la kdew ïa ka jingkit kaba khia ha ka liang ka pisa tyngka bad kiwei kiwei da kaba ong ba kine ki tiar kam da donkam ban pyndait ha ki kali trai shnong.
”    Ka jinglut ha kaba thied, ka jingpyndait, bad maramot ïa ki tiar Vehicles Location Tracking devices ka buh ha ka jingkit kaba khia palat ha ka liang ka pisa tyngka ïa ki nongñiah kali kiba tlot ha ka liang ka ioh ka kot bad ki trai kali kiba rit,” ong u President ka East Khasi Hills Local Taxi Welfare Association (EKHLTWA) u Wandonbok Jyrwa ha ka dorkhas ba la ai ha u Dhar ha ka sngi Balang.
Ka association ka la pyrshah kham mynshwa ïa ka jingthmu, bad mynta ka pan ban pyllait ne ka jingiarap pisa bad ki kyndon ba shai ban ïada ïa ki data.
“Ngi kyrpad da ka jingsngewrit ban pyllait na ka jingbuh ïa ka Vehicles Location Tracking bad ban pynsangeh noh ïa ka jingpyntreikam tad haduh ban da ïamir jingmut bha bad ki nongdon bynta lang,” u la ong.