Bun ki krem ba itynnad ba don ha East Jaiñtia Hills, dei ban pynneh pynsah kyrpad ka KSU

Khliehriat Rymphang 04 : Ki nongïalam bad ki dkhot jong ka Khasi Students Union ba kynthup, u Publicity Secretary KSU Seng Kmie, u samla Pynshaikupar Dkhar, u General Secretary KSU East Jaiñtia Hills District Unit, u samla K.S.Suchiang, u Finance Secretary KSU East Jaiñtia Hills District, bah Shaniahskhem Dkhar lem bad ka KSU Shnongrim Unit, mynha ka 3 tarik mynta u bnai rymphang ki la leit ban ïuhkjat bad jngoh ïa ka krem khmat Wah Tisha kaba don ha ka shnong Shnongrim kaba hap hapoh ka Elaka Nongkhlieh bad lyngba ka tnat Culutural Cell ka seng ka kyntu ïa ki paidbah ka District bad ki nongshong shnong ba ki dei ban pynneh pynsah ïa ki krem kiba don ha East Jaiñtia Hills District.
Kum ban shu bynrap, ka long kaba shisha ba ka East Jaiñtia Hills District ka dei ka district kaba don bun bha ki krem ki kroh kiba itynnad bad kiba don ruh ka khana tang kiba donkam ban pynneh pynsah pateng la pateng, ki ju don ruh ki riew ieid mariang khamtam ki nong rung krem kiba tbit bha kiba napoh ka jylla, kiba na bar ka jylla bad wat na bar ri ruh kiba la ju wan jngoh bad rung sha ki krem kiba don ha East Jaiñtia Hills District.
Katkum ka jingiathuh ki dkhot ka KSU la ong ba ka khana ka ong ba katei ka krem Kut Sutiang ka dei ka krem kaba phet rieh u Woh Kiang Nangbah bad ki shipai jong u ha ka por ba ki ïakhun pyrshah ïa ki dohlieh ha ka por ba jur bha ka thma myn ha ki snem 1862-1863 bad ka jingleit jong ka seng sha katei ka krem kaba don ha Shnongrim ka dei halor ka jingthmu ban pynsah nam ïa kitei ki krem kaba pawnam kaba don ka khanatang khnang ba ki longdien kin tip ïa ka khana lane ka History jong ki por kiba barim.
“La donkam eh ban pynneh pynsah ïa ki matti ne ki jaka don nam kiba u Blei Trai Kynrad Nongbuh Nongthaw u la ai sngewbha ha ngi bad buh ha pneh ka mei mariang bad ha kane ka jingleit jngoh ka seng ka la lap ba hapoh katei ka krem Kut Sutiang ki dang don ki dak ki shin ba dang sah kum ki siang jyntah kiba la rim bha bad ïa ki maw kiba ïa syriem kum ki shuki ha kaba ba la iathuh ba u Woh Kiang Nangbah bad ki nongïalam ki ju ia shong jingïalang hapoh katei ka kem”
Ka seng lyngba u kyrwoh ba la phah da u Publicity Secretary KSU East Jaiñtia Hills District, u samla Hamewanpynhun Ryngkhlem ka ong ba “Ka KSU East Jaiñtia Hills District Unit halor kane ka mat ka kyntu ruh ïa ka sorkar ba ka dei ban leh sor jamin bha ïa kine ki jaka kiba don ïa ka kahnatang lane ka history ba don nam khnang ba kan pynlong ïa kine ki jaka kum ki jaka jngoh kai pyrthei ha kaba ki briew shityllup ka pyrthei kin tip bad ki briew kiba na kitei ki thaiñ ruh kin im kamai na ka kam jngoh kai pyrthei bad ka seng halor kane ka mat kan sa buh da ka jingthoh sha ki bor ba dei peit bad ruh ban wad ki lad jingiarap ban pyn pawnam ïa katei ka jaka bad kiwei kiwei ki jaka kiba don hapoh ka district khnang ba ki paidbah jong ka district hi baroh kawei kin ioh ïa ka kamai ja kpoh na ka kam jngoh kai pyrthei”