Markhmat bad ki heh ka NHIDCL, MORTH bad Defence kynduh u Dy.CM ha Delhi

Shillong, Rymphang 04 : U Symbud Myntri Rangbah ka Jylla, Bah Prestone Tynsong u la leit ban kynduh markhmat ïa u Managing Director jong ka National Highways & Infrastructure Development Corporation Ltd (NHIDCL) bad kumjuh ïa u Director General jong ka Ministry of Road Transport and Highways (MORTH) ka sorkar pdeng ban buddien haba ïadei bad ka jingpyntrei ïa ki lynti syngkien bad ki kam pynroi ha Meghalaya.
Ha kane kajuh ka sngi u Bah Prestone u la kynduh ruh ïa u Director General jong ka tnad Defence ban ïakren ïa ka jingdonkam ban aiti noh ïa ki katto katne ki jaka jong ka tnad Defence kiba don ha Sor Shillong sha ka Sorkar Jylla.
Na ka liang u Symbud Myntri Rangbah ha ka jingkynduh ïa u MD jong ka NHIDCL u la ïathuh ba ki la ïakren ban shna ïa ka Fly Over haduh Barik Point ban pynsuk ïa ka leit ka wan jong ki paidbah.
“Nalor kane, ngi lah ïakren ruh halor ka High Speed Corridor na Umïam sha Malidor, ka Shillong-Dawki Road bad halor ka surok na Phulbari shaduh Agia. Kumta, nga kyrmen skhem ba shisien ba ngi lah shna pyndep ïa kine ki projek baroh, kan long ka jingmyntoi ïa ki paidbah,” u la ong.
Ha ka jingkynduh pat ïa u Director General jong ka MORTH u Symbud Myntri Rangbah u la ïathuh ba ki la ïoh ban ïakren bniah halor ki projek ban pynkylla noh ïa ki jingkieng ba shu shna shipor sha ki jingkieng dewbilat kiban neh slem ha kylleng ki bynta jong ka jylla.
“Ngi lah ïakren ruh ïa ka jingdonkam ban shna pynbha noh ïa ka surok Shillong -Nongstoin – Tura Road bad ïa ka surok na Phulbari-Rajabala-Mahendraganj kaban poi shaduh Mancacha.”
Haba ïadei pat bad ka jingkynduh ïa u Director General ka tnad Defence u Bah Prestone u la ong, “Nga ngeit skhem ba shisien ba ngi lah ïoh ïa ki jaka na ka tnad Defence, ngin ïoh ban leh ïa kiba bun ki projek kiba kongsan kiban wanrah ïa ka bha ka miat jong ki paid nongshong shnong ka jylla.”