Nongpoh, Rymphang 03: U Myntri ka Sorkar Jylla uba peit ïa ka tnat Community & Rural Development (C&RD), u Bah Sosthenes Sohtun, mynta ka sngi u la plie paidbah ïa ka Sampoornata Abhiyan 2.0 ha Ri-Bhoi District, kaba dei ruh kawei na ki Aspirational District jong ka Jylla Meghalaya. Kane ka prokram ka don ka thong ban kyntiew bad pynsted ïa ka roi ka par ha ki shnong ki thaw jong ka district.
Ïa ka jingïalang plie paidbah la pynlong ha Parish Hall, Nongpoh, ha kaba la sakhi lang da u Bah Mayralborn Syiem, MLA ka Nongpoh, u Bah Abhilash Baranwal, Deputy Commissioner ka Ri-Bhoi District, lem bad ki ophisar na ki tnat sorkar bapher bapher.
Haba kren ha kane ka jingïalang, u Bah Sosthenes Sohtun u la ong ba ka Sampoornata Abhiyan 2.0 ka thmu ban pynpoi ïa ki kam pynroi sha ki jaka nongkyndong, khamtam ha ki bynta ba la ithuh hapoh ka Aspirational District Framework. U la kyntu ïa ki tnad sorkar bapher bapher ba kin don ka jingïatreilang kaba jan ban pyntreikam ïa ki kam ba kongsan kum ka koit ka khiah, ka pule puthi, ka rep ka riang, ka jingkyntiew ïa ki sap jong ki khun samla bad kiwei kiwei ki kam pynroi.
Na ka liang u MLA ka Nongpoh, u Bah Mayralborn Syiem, u la khot bad wer ïa ki heh ophisar bad ki nongtrei ba shakhmat jong ki tnad sorkar bapher bapher ba kin ai ka jingïatreilang kaba pura, khnang ba kane ka prokram kan lah ban long kaba jop khnang ba kan long ka jingmyntoi ïa ki paidbah ka Ri-Bhoi.
Ka jingplie paidbah ïa ka Sampoornata Abhiyan 2.0 ka long ka dak jong ka jingangnud jong ka Sorkar Jylla ban pyndap ïa ki jingduna ha ka roi ka par bad ban kyntiew ïa ka imlang sahlang ha kylleng ki shnong shnong jong ka Ri-Bhoi District, kaba la ïoh ïa ka kyrdan kum ka Aspirational District.
