Shillong, Rymphang 02 : Namar ka jingpyntrei ïa ka surok Shillong – Dawki hajan Mahadev Khola Dam kaba don ha 101 Area Upper Shillong kaba don kumba 250 mitar ka dang ïaid shaid shaid kumta na ka liang u Superintendent of Police ka East Khasi Hill, Bah Vivek Syiem u la pynbna paidbah ba ki trok 407, 409 bad kumjuh ki bos ba kamai kin hap ban ïaid noh na 5 Mer Upper Shillong kaban mih pat sha Lum Shillong (Shillong Peak) nangta pat sha Pomlakrai, katba kito kiba don ha ki thain mes (Rilbong) point pat kin ïaid lyngba ka Anjalee Point sha Barik Point nangta sha Dhanketi Point – Fire Brigade Point – Madanrting – Laitkor bad mih pat sha Pomlakrai.
Na ka bynta ki kali ba kham heh ne kiba kit ïa ki mar kiba kham khia (Heavy Motor Vehicles) kiba wan na Nongstoin/Mawngap kin phai noh na Mawmaram ban ïaid lyngba ka surok Lawmei kaban mih sha surok Umsaw.
Shuh shuh la bthah ba kito ki kali heh ne kiba kit mar khia kiba wan na ki thain Sohra/Pynursla kin phai na 7Mer Upper Shillong bad kin ïaid noh lyngba ka surok Mawngap ban poi sha Mawmaram.
Ha kajuh ka por ka jingbthah na u SP ka ong ruh ba na bynta ki bos ba kit ïa ki khynnah skul yn shah ban ïaid sha MES Point na Upper Shillong bad ruh ynda la dep.
Kawei pat ka jingbthah ka long ba ki kali kiba ïaid lyngba katei ka surok ba dang shna kan dei hapoh 20kmph ha baroh shi lynter katei ka surok.
Kane ka jingbthah la ong ba kan treikam noh naduh mynta ka sngi, ka 03tarik Rymphang – 18 tarik Rymphang, 2026.
