Shillong, Rymphang 02: Ka Meghalaya Pradesh Congress Committee (MPCC) ka la kynmaw ïa ka jingïoh kaba 20 snem jong ka Mahatma Gandhi National Rural Employment Guarantee Act (MGNREGA) da ka jingsngewdiaw halor ka jingduh noh ïa kane ka Act.
Kaei kaba la long mynshwa kum ka hok kaba la ai ki jingkular ban ai kam ïa ki nongshong shnong ha ki thaiñ nongkyndong mynta la shah pynkheiñ noh ha ka sorkar pdeng ba la ïalam da ka BJP da kaba bujli noh da ka scheme kaba la shah ïa ka jylla ban kynriah shadien lada ki kam ki long ki bym lah ban don. Kane kam dei satia kata ka jingwan rah jingkylla, ong ka MPCC.
Ka la ong ruh ba ïa kane mynta ka la dei kaba la shah iehnoh. Ka MPCC ka la ong ruh ba ka MGNREGA kam dei satia ka polisi ha ki kot ki sla. Ka mut ki bai bylla ha ki por ba don ki jingeh, bad la pynbor ruh ïa khyndiat ki longïing ban phetwir, ïa ki khynnah ban don ha ki skul, bad ka kyrdan na ka bynta ki longkmie ban kamai tang ha la ki ïing ki sem. La thaw ïa ka ha ka jingshisha kaba suk, bad ka jingduk kam dei satia ka jingpulom kaba shimet. Haba ka ïew ka hat kam lah ban ai kam, ka jylla ka pdiang ïa ka jingkitkhlieh.
“Lah jan 20 snem, hapdeng ki jingbakla bad ki jingpynslem, ka MGNREGA ka phah ka khubor kaba shai sha ki nongshong shnong, ba phi don ka hok ban pan ïa ka kam, bad ka jylla ka dei ban jubab. Ïa kane ka jingkular mynta la shah wengnoh bad la bujli da ka VB-GRAMG scheme, kaba dei u pud, bad kaba la shah pynïaid ha ka sorkar pdeng, bad ka shaniah ha ki jingmynjur bad ka pisa bad kaei kaba la duhnoh kam dei tang ka programme, hynrei ka jingpynthikna ba ka jylla ka dei ban leh haba ki paidbah ki la shah khynniat sha ka jingthngan bad ka jingbym shngaiñ,” ong ka MPCC.
Ka la ong ruh ba kito kiba shim ka rai ban pynduh noh ïa ka MGNREGA kim ju ïeng satia ha u laiñ ban ap ration ne ban ap da ki bnai na ka bynta ki bai bylla ba khlem pat siew. Ki khun jong ki, kin ym shah pynmih na ki skul namar ki kam ki la jah noh, bad ka jingduh kaba khraw bha hangne kam dei ka jingïoh jingkot hynrei ka kyrdan.
“The Meghalaya Pradesh Congress Committee ka pynrem jur ïa ka jingpyndam ne wengnoh ïa ka MGNREGA bad ka dawa ba dei ban wanrah biang ïa kane ka hok ban trei. Ka seng Congress ka ïeng skhem bad ki nongbylla ha ki thaiñ nongkyndong, ki longkmie, ki Adivasi, Dalit, ki briew kiba don jingïapher ha ki dkhot met bad baroh kito kiba ki jingim jong ki bad ka kyrdan ki shaniah ha kane ka aiñ,” ong u Bah Lang Kupar War Chairman, Social Media Department, Meghalaya Pradesh Congress Committee.
