Rakhe ka NRBEC ïa ka Jubili Rupa ha Byrnihat, tuid riewngeit na kylleng ka NE

Nongpoh, Rymphang 02: Ka Northeast Regional Basic Ecclesial Community haka sngi u Blei kala rakhe ïaka Jubili Rupa jong ka jingdap 25 snem ka jingïaid lynti naduh bala seng ïaka ha u snem 2000.
Ha kane ka jingrakhe la wan ban shim bynta da ki paid riewngeit na kylleng ki dong bad ki thaiñ, bad ki parish bapher bapher jong ka thaiñ Shatei Lam Mihngi ba kynthup ïa ka Guwahati, Aizawl, Agartala, Tura, Shillong, Imphal, Kohima, Itanagar, Diphu, Miao, Tezpur, Jowai bad Nongstoin. Ka phang pdeng jong kane ka jingrakhe ka long: “Ka ktien u Blei ka pynkylla ïa ka thaiñ Shatei Lam Mihngi lyngba ka Basic Ecclesial Community.”
La sdang ïa kane ka sngi da ka mass bakhuid ba la shimbynta da u Most Rev Archbishop John Moolachira jong ka Guwahati Archdiocese ha ka jingysnran lang kiwei ki Bishop, ki Lyngdoh, ki riewniam, bad ki paid jong u Blei.
Haba pharia ïa ka ktien u Blei, u Most Rev Archbishop John Moolachira u la ong, kaei kaba ngi ki briew ngi leh ha ka 24 kynta shi sngi bad 7 sngi shi taiew ka long ban pyrkhat ïa kiei kiei kiba lah ban wanrah ka jingkmen kaba shisha ha ka jingim jong ngi. Ngi iakhun ban long kiba riewspah, kiba pawkhmat bad ban long kiba don bor, hynrei kine baroh kim lah ban pynhun ïa ka mynsiem, lada ngim phai khmat sha u Blei u bad lada u Mynsiem bakhuid um don hapoh ka mynsiem jong uwei pa uwei.
Kila sneng la kyntu ruh ba kum ki paid khristan ngi dei ban sheptieng ïa u Blei u ba don bor tam bad u bahalor tam namar dei ma u uba pynïaid ïaka jingim jong ki ba man ka sngi.
La pynphuh pynphieng ruh ha kane ka sngi da ki prokram bashongshit ba la shim bynta da ki khun samla ka Balang.