ïoh ka jylla 190 klur tyngka ban pynroi sha nongkyndong 49 klur tyngka ban pynroi ha ki jaka sor

Shillong, Rymphang 1 : Ka sorkar jylla lyngba u Myntri Rangbah u Conrad K Sangma u la ai ka jingïaroh ïa ka mang tyngka jongka Sorkar Pdeng na ka bynta u snem 2026-27 kaba la wanrah da ka Myntri Kam Pla pisa ka sorkar pdeng ka Nirmala Sitharaman da kaba kynthoh ba ka dei ka mang tyngka ka ban pynïaid shakhmat ïa ki kam pynroi hapoh ka ri India.
U la ai khublei kyrpang ïa ka Myntri Kam Pla Tyngka kaba la mang 190 klur tyngka na ka bynta ki kam pynroi sha ki thaiñ nongkyndong kaba lah ban long kum ki Grant sha ki Bor Synshar Shnong bad 49 klur tyngka na ka bynta ki kam pynroi ha ki jaka sor kaba lah ban long kum ki Grant na ka bynta ki tnad ba peit ïa ki kam pynroi sor. La mang ruh 63 klur na ka bynta ka State Disaster Response Fund,16.20 lak na kabynta ka State Disaster Mitigation Fund.
U la ong “ Kane ka mang tyngka ka dei ka ban pynïaid shakhmat ïa ki kam pynroi pynpar hapoh ka ri bad ka dei ka sienjam ka ban kyntiew ïa ka Viksit Bharat ka ban ïarap ha ki kam seng kam seng jam, ka jingkyntiew ïa ka roi ka ar jong kane ka ri bad kane ka thaiñ hi baroh kawei.
Ka sorkar jylla ka la pdiang sngewbha ïa ka jingkyntiew haduh 1.85 lak tyngka ha ka Special Assistance to States for Capital Invesment (SASCI) da kaba ong ba kane kan ïarap ban kyntiew ïa ka roi ka par ha kiba bun ki kam ki jam kumjuh ruh ha ki surok bad lynti syngkieng.
Ha kajuh ka por u la ong pat ruh ba ki don ki jingpynkylla ha ka mang tyngka kiba lah ban ktah ïa ka jylla ha kaba ïadei bad ka bhah khajna bad wat ki rukom buh kyndon ha kaba ïadei bad ka GDP ruh kaba lah ban kttah ïa ki jylla kiba rit.
Shuh shuh u Joint Secretary uba dei peit ïa ka Pla Tyngka u la ai ka jingïaroh ïa kane ka mang tyngka kaba phai khmat sha kane ka thaiñ shatei lam mihngi ka ri India. U la ong “ Kane ka Mang Tygnka ka kdew shai ïa ka polisi ba ka sorkar pdeng ka shim khia ban kyntiew ïa kane ka thaiñ da kaba ithuh ïa ka jingdonkam ban phai khmat namar ka don kiei kiei kiba dang hap ban shim khia ban kyntiew ïa ka thaiñ khamtam ha ka liang ka khaïi pateng.
U la ong ba ka 10,000 klur tyngka na ka bynta ka SME Growth Fund kan ïarap ban kyntiew ïa ka jingpynïasoh ïa ka Meghalaya bad kiwei ki jylla kane ka thaiñ, ban kyntiew ïa ki kam jngohkai pyrthei bad kumjuh ruh ban pynïoh kam ïoh jam ïa ki samla ka jylla Meghalaya.
Ka sorkar jylla ka la ai ruh ka jingïaroh halor ka jingphai khmat sha ki kam kum ka pule puthi, ka koit ka khiah, ka rep ka riang bad kiwei kiwei.