Shillong Rymphang 01: Ka Riatsamthiah Sports and Cultural club (RS&CC) ïa kaba la seng naduh ka snem 1950 ka la pynhab pyrda noh ïa ka jingrakhe dap 75 snem jong ka ha ka sngi Saitjaiñ ka 31 Tarik Kyllalyngkot da kaba pynlong ïa ki prokram bapher bapher, ha kaba ka phang jong kane ka jingrakhe ka long ‘Say no to Drugs’ bad ‘Yes to Life’.
Ha kane ka jingrakhe pyrhab pyrda la wan ban long kongsan da u MLA ka 17th North Shillong Constituency u Bah Adelbert Nongrum, u Symbud kongsan u MDC bad u Chairman ka KHADC u Bah Strong Piller Kharjana, ha ka jingdonlang u Rangbah Shnong Bah Mariahom Kharkrang, ki nongkitkam shnong, ki riew pawkhmat ka shnong, ki nongshong shnong bad kiwei kiwei kiba la shah khot sngewbha, nalor ki nongshong shnong kiba rim.
Lah ban ong ba ïa kane ka club kaba la thaw naduh u snem 1950, hapdeng katto katne snem ka la pjah bad kynjah noh jar hynrei naduh ba la shimti ki nongkitkam thymmai ka la ïeng rasong bad shitrhem biang bad kiba la trei shitom ban wad ïa ki nongrim ka club kaba la ïeng naduh mynshwa ban kyntiew ïa ki sap ki phong jong ki khun samla ka shnong baroh kawei.
Haba kren kum u kongsan u Bah Adelbert Nongrum u la pynpaw ïa ka jinghiar arsut jong ka jaitbynriew na ka daw ka jingshah tyllep ha kane ka juk mobile phone naba bun na ki samla ki la pynlut bun kynta ha kamra tang bad ka mobile phone naba kane ka long ka jingma kaba khraw ïa ka jaitbynriew. Kumta u la kyntu ïa ka club ba kan trei shitom shuh shuh ban kyntiew ïa ki sap ki phong jong ki khun samla lyngba ki lad jingïalehkai khnang ba kan long ka jingmyntoi ïa ka koit ka khiah bad kyntiew ïa ka bor pyrkhat bad ban lait na ki jingsniew baroh, kiba wan khamtam eh na u drok.
Katba u Symbud kongsan u Bah Strong Piller Kharjana MDC u la ong ba kum kine ki prokram kan ïarap ban sei ïa ki sap ki phong ki nongshong shnong.
“Ngi ïoh ïa u Rangbah shnong uba kat u rangbah shisha uba don ka jingkitkhlieh kum u nongïalam ba ka shnong ka long mynta kumba ka long bad kumjuh ruh da ka jingïatreilang ki nongkitkam shnong, ka seng samla, ka seng kynthei ba la lah ban kyntiew ïa ka shnong baroh kawei,” ong u MDC.
La ïoh ka jingkren maitphang na u President ka Club u Bah Jonathan Suchiang halor ka khana Lyngkot ka club, la ïoh ka jingkren na u Rangbah Shnong Bah M Kharkrang uba la pynpaw ia ka jingeh kaba mih na kane ka juk mobile, naba ki samla ne ki hep kiba rit kim mih shuh sha ki madan ïalehkai ban lehkai na ka bynta ka jingkoit jingkhiah ka met ka phad, hynrei ki la ialehkai mynta tang da ki shympriahkti ha la ki jong ki kamra.
U la kyntu ïa ka Club ba kan wad ïa ki samla bad ki hep kiba rit kiba don ha ka shnong kiba don ki sap bapher bapher ha shwa ba kin leit ban ai burom pat sha kiwei ki shnong ne ki jaka.
La sam ïa ki memento sha ki nongkitkam barim, sha kiba la nohsynniang, bad kumjuh ruh la sam ïa ki medal bad certificate sha ki nongjop ïa ki jingïalehkai bapher bapher.
Na ka liang u kongsan, symbud kongsan bad kiba shah khot sngewbha ki la pynlait ïa ka Souvenir bad la ot ruh ïa u cake kum ka dak ka jingrakhe ïa ka Platinum Jubilee ka Club.
La ïoh ruh ki jingshad, jingrwai, ka fancy dress na ki heprit bad kiwei kiwei ki prokram.
La ïathuh ba ha u snem 1950 ïa ka club la ai da ka kyrteng Riatsamthiah Sports club bad ha u snem 1997 pat la pynkylla sha ka Riatsamthiah Sports and Cultural club ha kaba kane ka club ka la sei shibun ki riew rangbah, ki samla ba la wanrah burom ïa ka jylla bad ka shnong hi baroh kawei.
