Kan sa poi ka por ba ngin hap kit da ka Oxygen ha met ban ring mynsiem, ong ka KSU

Khliehriat, K’ Lyngkot 30: Ka public hearing jong ka company Cement International Limited (C.I.L) ba la pynlong mynta ka sngi ha Lumshnong East Jaiñtia Hills District ka la ïaid beit haduh kaba kut bad kane ka public hearing ka long halor ka jingthmu ban khlong ïa u mawshun na kawei ka par “Khad-Moosiang Limestone Deposit” kaba don ha shnong Lumshnong.
Ha kane ka public hearing ki la don baroh khat lai ngut kiba la ai jingkren ha kaba 12 ngut ki dei kiba ai jingyrshan ïa ka Cement International Limited (C.I.L) bad tang ka Khasi Students Union Narpuh Circle kaba pyrshah ïa ka public hearing.
Katkum ka jingbatai, la ong ba kane ka par mawshun “Khad-Moosiang Limestone Deposit ka don ka jingheh kaba 4.7 hecter bad yn khlong ïa u mawshun 242758.60 TPA ha ka shi snem.
Ïa ka public hearing la plie da u ADC ka East Jaiñtia Hills District, u Bah C.P. Mawkon, MCS bad la pynïaid ïa ka public hearing da u Environmental Engineer ka tnat Meghalaya State Pollution Control Board u Bah Y. F. Laloo.
Kiba la ai jingkren ki kynthup u Doloi Elaka Narpuh, u Manbha Kyndoh ha kaba u la kyntu ruh ïa ki bor ba halor kiba dei peit ïa kane ka kam ba kin sngewbha ban pynkloi noh ban ai jingbit lane ka Cleareance khnang ba ka C.I.L kan ïoh ban tih noh ïa u mawshun ba kan long ruh ka lad ïohkam ïohjam ïa ki briew ka thaiñ.
U Waheh Shnong Lumshnong, u Bah Monlang Ladong, u la ong ba ka shnong ha shwa ban ai ka jingkyrshan ka la ïa shong da ka executive committee bad la ïa pynbeit halor kane bad ka la don ka jingïateh kular ruh bad ka company Cement International Ltd na ka bynta ka jingïoh jingmyntoi lang ki nongshong shnong bad hadien ka jingïasngewthuh jingmut lang kum ka shnong hi baroh kawei ka la pdiang bad ai ka jingkyrshan ïa ka public hearing.
Kiba kyrshan ki la kyrpad ruh ïa ki bor ba halor ba kin pynkloi noh ban ai ka clearance ïa ka C.I.L ba kan ïoh ban khlong ïa u mawshun na kane ka par.
Na ka liang u President KSU Narpuh Circle, u Bah Phanuel Tongper, u la ong ba ka KSU ka pyrshah ïa kane ka public hearing jong ka Cement International Ltd bad ka seng kan pyrshah beit ïa kano kano ka public hearing ka ban wan nangne shakhmat ruh namar ka seng kam kwah ban ïohi ïa ka jingjot jingpra ka mariang, kam kwah ban mih ka jingshah kynnoh. “Ka jingpyrshah jong ka seng ka long halor ka nongrim ba ngi la ïohi ba kane ka jingtih mawrasong ne mawshun ka long kum kita ki ramhah kiba pynjot ïa ka mariang, nga ïohi ruh ba wat mynta ruh ki paidbah ki mad jingeh ha ka umbam umdih ha kaba ki um ki wah ki la jakhlia, ka lyer ruh ka la jakhlia bad kaba ma ba ïoh kan poi ka por ba ngi hap kit da ki tyndong lyer oxygen ha met ban ring mynsiem,” ong u Bah P.Tongper.
Kiba la ai jingkren bad kiba kyrshan ïa ka public hearing ki kynthup ruh u Bah Sairos Lamare uba na shnong Sonapur, u Waheh Shnong barim ka Chehruphi, u Bah Minot Sympli, Bah Da-o Lapasam, na Chiehruphi, Bah Lamchwa Kyndoh na Lumshnong bad kiwei kiwei.