Mawkyrwat, Kyllalyngkot 30: Ka Se-Lajong Football Club bad ka Warsanlyngdoh Sports & Cultural Club ki la ïoh ban rung sha ka phainal jong ka Rowell Lyngdoh Memorial Football Tournament 2025-26 hadien ba ki la jop ha ki jingïakhun semifinal.
Ka Se-Lajong Football Club ka la ïoh ban buh jaka ïalade ha ka phainal hadien ba ka la lah ban pynliem noh ïa ka Sohkhyllam Sports Club lyngba ka tie breaker ha ka Semifinal kaba nyngkong ha ka 26 tarik u Kyllalyngkot, 2026, ha Rowell Lyngdoh Stadium.
Kane ka jingïalehkai ka la long kaba itynnad bha ha kaba baroh ar tylli ki kynhun ki la ïakhun tyngeh ban pynkhih jar hynrei ym shym la don ba lah ban leh kumta haduh kaba kut noh jong ka jingïalehkai. Kumta la hap ban pynlong noh da ka tie breaker. Ha ka jingïashut tie breaker ka Se Lajong FC ka ïoh ban thep 6 kol katba ka Sohkhyllam SC pat ka la ïoh ban thep tang 5 kol. Kumta ka jingjop ka la long ia ka Se Lajong FC.
Kumjuh ruh, ha ka jingïalehkai Semifinal kaba ar kaba la long ha ka 30 tarik u Kyllalyngkot, 2026, ka Warsanlyngdoh S&CC ka la jop noh ïa ka Meghalaya Police Football Team lyngba ka tie breaker. Ha kane ka jingïalehkai ruh, ym shym la don ba lah ban thep kol maduh ba sdang haduh ba u referee un da put ïa u bisil pynwai bad la hap ban pynïaleh noh da ka jingïashut tie breaker. Lyngba ka tie breaker, ka Warsanlyngdoh S&CC ka la jop ïa ka MLP FT da 4 la 3 bad ïoh ban rung syndon sha ka phainal.
Namarkata, ka Se Lajong FC bad ka Warsanlyngdoh S&CC kin sa ïa ai reng ha ka phainal jong kane ka lympung ïalehkai. Kumta, ka Mawlangwir Sports Club ka khot ka wer sa shisien pat ïa ki riewieit phutbol jong ka thaiñ ba kin wan ban sakhi ïa kane ka jingïalehkai phainal bad ban wan ban ai mynsiem ïa ki kynhun ïalehkai ki ban sa ïakhun pyrshah. Ha kaba ïadei bad ka tarik jong ka phainal, ka Mawlangwir Sports Club kan sa pyntip pyntip paidbah hadien lyngba ki rynsan social media jong ka Club. Kane ka long ka kyrwoh lyngba u Publicity Secretary jong ka Mawlangwir Sports Club.
