Na ka tanker kit umphniang petrol kurup ki pulit ka EJHD ïa u drok herion ba shongdor 20 lak tyngka

Khliehriat, K’ Lyngkot 30: Ki pulit Anti-Narcotics Task Force of East Jaiñtia Hills District ha ka miet sngi Palei ki la ïoh khang kdong ïa kawei ka kali trok umphniang tanker kaba don u registration number AS 11 DC-1200 bad hadien ba la khynra ki pulit ki la lap ïa ki drok bad halor kane la kem noh ruh saw ngut ki briew kiba suba donkti ha ka kam khaïi drok.
Ka khubor ba la phah da u Superintendent of Police East Jaiñtia Hills District, u Vikash Kumar, IPS u la ong ba hadien ba la ïoh ïa ki jingtip ba tikna bha ba don ka kali ba kit drok, kumta mar mar ki pulit Anti-Narcotics Task Force of East Jaiñtia Hills District ki la thaw ka ktem pynap shrip ha Umkiang police Patrol Post bad ka kynhun ki pulit ki la ïoh ban khang kdong ïa ka trok tanker ba kit umphniang bad ki la kurup noh ïa u drok herion uba don 45.5 gram ba la thep hapoh ki saw tylli ki synduk sabon bad une u drok u shongdor haduh T. 20 lak lada die beaiñ ïa u.
Ki sawngut kiba la shah kem halor ka jingsuba donkti ha ka kane ka kam khaïi drok ki dei kiba la tip kyrteng kum u Shymal Boro uba na ka shnong Lokhra Chariali PO/PS-Gorchuk District Kamrup, u Matab Uddin, uba na shnong Khelma Pt-VII PS-Katigorah, Silchar, Dist – Cachar, Assam, u Ataur Rohman, uba na Shiberchak PO Shiberchak, Karimganj Assaam bad u Biren Singha, uba na Madhopur PS Katlicherra District Hailakandi, Assam, ki pulit ki la register ïa ka case ha Lumshnong Police Station bad pynngat hapoh ki kyndon aiñ jong ka NDPS Act bad ka jingtohkit ka dang ïaid shakhmat ha kaba ïadei bad kane ka kam.
Nalor u drok, ki pulit ki la kurup ruh saw tylli ki mobile phone bad la suba jur ruh ba kitei kiba shah kem ki dei kiba na ka kynhun kaba ju trei ïa kane ka kam khaïi drok ban pynpoi ïa ki drok na kawei ka jylla sha kawei pat ka jylla.