Shillong, Naitung 10 : U President ka Meghalaya Pradesh Congress Committee (MPCC) u ma Vincent H Pala u la ïathuh ba ka Congress ka la dep jied shwa 43 ngut ki kyrtong kat haduh mynta bad kaba sah ka long sa tang 17 tylli ki Constituency namar ka jingpynthymmai ïa ki Block Congress Committee (BCC) ha kitei ki constituency kan dang ïaid shaphrang.
ïa kane u la pynpaw haba kren ha ka jingïalang ban pynthymmai bad pynkhie im biang ïa ka Block Congress Committee (BCC) jongka East Shillong Constituency ha ka Sngi Saitjaiñ.
U la ong “ Ki paid nongshong shnong ha kane ka kynti ki kwah ban ïoh noh ïa ka jingsynshar kaba lait na ka bamsap bad synshar bakla. Ka Meghalaya kala ïoh ïa ka nam kum kata ka jylla ba duk tam ha ka ri bad ka daw ka dei na ka jingsynshar jongkane ka sorkar MDA ha kaba kam don shuh ka jingsynshar kaba pyrkhat ïa ka roi ka par jong ka jylla bad ki paidbah hynrei la shu pyrkhat beit tang kumno ban dap ban biang ïalade shimet. ïa ka pisa ba dei ban leit sha u paidbah kala poi sha ka pla ki nongsynshar jong kane ka sorkar na kata ka daw kane ka jylla ka sa hiar bad hiran haduh katne mynta”.
U la ong ruh ba ka Congress ha kane ka kynti kan sei da ki kyrtong kiba dang khuid dang suba kiba dang lait na ka jingbam sap bad lyngba kine ki paidbah kin sa ïoh biang ka jingshaniah skhem bad pura ha ka jingsynshar jongka Congress.
U la pyntip ruh ba u bah Manuel Badwar un long u kyrtong uba ka Congress kan pynïakhun na East Shillong Constituency pyrshah ïa I kong Ampareen Lyngdoh.
