Mar ïadep pynbna tiket MDC ha GHADC yn shongshit sa ka jied MP sha Rajya Sabha

Shillong, K’Lyngkot 29 : Ka jingïakren shaphang ka jingjied ïa u MP ba thymmai sha Rajya Sabha na ka jylla Meghalaya ka la sdang ban shongshit bha khamtam ha ka sorkar synrop jong ka Meghalaya Democratic Alliance (MDA) kaba ïalam da ka National People’s Party.
Kumba long mynta hi, ka samoi treikam jong u MP ba mynta ha Rajya Sabha, Dr. WR Kharlukhi kan sa kut noh ha u Jylliew mynta u snem.
Mar ïa mih kine ki khubor la ïoh ruh ban ïa kren bad bun ngut bha ki nongïalam party bad kiba bun na kine ki la pynpaw ba dei tad ynda la dep pynbna ïa ka thup jong ki kyrtong MDC ha Garo Hills Autonomous District Council (GHADC) kane ka kam kan sa shai lut.
Katkum ki khubor ba la ïohlum la ïathuh ruh ba ka la don ka jingïakren hapdeng ki heh jong ka National People’s Party (NPP) kaba ïalam ïa ka sorkar jylla na ka bynta kane ka ishu hynrei haduh mynta kam pat don ka rai ba kin shim. La ïoh jingtip ruh haduh mynta ki don kumba lai tylli ki kyrteng kiba paw kham hakhmat kynthup ïa ka kyrteng jong u Chairman jong ka Farmer’s Front, Bah HM Shangpliang nalor ka kyrteng u National Working President ka party, James K Sangma.
Lah ruh ban kdew hangne, ba ka la mih ka jingai jingmut na ka liang ki nongïalam ka party ba u MP u ban mihkhmat mynta ka kynti u dei ban long uba shemphang bad uba don ka sur ban rah ïa ka ishu jong ka jylla bad khamtam jong ka thain shatei lam-mihngi jong ka Ri kaba long katkum ka thong treikam jong ka party.
Da kaba kiar ban pynpaw kyrteng kine ki nongïalam ka party ki ïathuh ruh ba mynta ka kynti ruh ki khmih lynti ba u MP ba thymmai ban mih bujli ha jaka u Dr. WR Kharlukhi sha Rajya Sabha dei ban ailad biang na rilum Khasi Jaintia
Da kaba ïaroh ïa ka jingnoh synniang jong u Dr. WR Kharlukhi uba la ieng ban ïasaid na ka bynta kiba bun ki ishu jong ka jylla, kine ki nongïalam ki ong ruh, “Ka jylla ka don bun bha ki nongïalam, kumta haba ka phah ïa ki MP sha Rajya Sabha ka dei ban bteng ban phah da ki briew kiba stad kiba shemphang bad kiba don ka sur ban pynsawa ha Iing Dorbar Thawaiñ jong ka Ri bad khamtam hakhmat ki ophis jong ka sorkar pdeng.”
Ki la pynpaw ruh ba dang don bun bha ki ishu kiba ïadei bad ka jylla kiba dang donkam ïa ka jingtuklar jong ka Sorkar Pdeng. Kumta ki ong ba dei tang lada phah da u Nongïalam uba nud bad uba shemphang ba ka jylla kan ïoh ban buddien ïa kine ki kam bad ki projek kiba dei na ka bynta ka roi ka par bad ka shongsuk shongshngaiñ jong ka jylla.
Shuh shuh ki la pynpaw ba ki dang don bun bha ki mat kiba ïadei bad ka jylla, la ka long naduh ka Inner Line Permit, ka jingdawa ban ïoh jingithuh ïa ka Ktien Khasi bad Ktien Garo ha ka Khyrnit kaba Phra kiba dang donkam ïa ka jingïakhun tyngeh u MP.
La ïoh jingtip ruh ba shen na ka liang u National President bad u State President ka NPP kin sa lum ïa ka jingïalang ban ïatai sani bha halor kane ka phang ha shwa ba kin shim ïa ka rai kaba khatduh ïano kin jied ban phah sha Delhi kum u MP ba thymmai ka Rajya Sabha na ka jylla.