Shillong K’ Lyngkot 29: Ka Lum Sohpetbneng Committee, Seng Khasi Kmie ka pyntip ba ka “Kiew Pyneh Rngiew” ba shisien shi snem sha kliar jong u Lum Sohpetbneng, kan long ha ka 1 tarik u Rymphang, 2026. Ha katei ka sngi yn sdang ïa ka lehniam ha ka khyrdop ha ka por 6 baje mynstep bad ka ban bud pat ha duwan ba kyntang jong u Lum naduh ka por 8 baje mynstep ïa ka ban pyndep da ka kynhun ki Tymmen ki San jong ka Seng Khasi Kmie.
Lyngba une u kyrwoh, ka Seng ka ïawer ïa baroh ki parakur parakha ba kin wan ïa shim bynta sha katei ka lehniam ba shisien shi snem.
La pyntip ruh ïa baroh ki ban wan ïa shim bynta ba yn ym shah ban kiew da ki Bus shajrong bad yn khang ban kiew kali shajrong Lum hadien ka por 1 baje mynsngi.
Ïa ki kali ba hiar pat yn pyllait naduh ka por 2 baje mynsngi. Shuh shuh la mana ruh ban buh basa ne die madan ha shi lynter ka surok naduh ba ïeng ki ïing jong ka Seng Khasi (Swadesh Darshan) shaduh sha kliar jong u Lum Sohpetbneng.
La kyrpad ïa baroh ban ïa treilang bad ki nong pynïaid khnang ba katei ka sngi kan long kaba ïaid beit ïaid ryntih khamtam bad ka jingïaid bad pynïeng ïa ki kali kiba wan.
Shuh shuh, khnang ban ai lad ïa baroh, ka Seng Khasi Kmie ka pynbna ruh ba ka duwan jong u Lum Sohpetbneng kan plie man ka sngi naduh ka sngi kiew eh rngiew haduh ka 15 tarik u Rymphang, 2026 naduh ka por 8 baje mynstep haduh 1 baje mynsngi ban ai lad ïa ki paidbah ki ba kwah ban leit duwai, ong kyrwoh khubor ba la phah da u Bah S. Bareh, Secretary, Lum Sohpetbneng Committee.
