Donkam ïa ki nongri dohkha ban ioh jinghikai bha katkum ka jingïaid ka por : SC Sindhu
La rakhe ïa ka Fish Farmer’s Day ha Ri-Bhoi
Nongpoh, Naitung 10 : U SC Sindhu Secretary ka tnad Fisheries Department ka jylla haba kren kum u kongsan haka jingrakhe ïa ka sngi ki nongri dohkha lane ka Fish Farmers’ Day ha Mawpun, Ri-Bhoi, u la ong ba ka long kaba kongsan ba ki nongri dohkha haka jylla kin ioh ka jingtip bad ka jinghikai ba pura katkum ka jingïaid ka por khnang ba yn lah ban dang kyntiew shuh shuh ïaka kam ri dohkha kawei naki lad ba ai jingmyntoi ïaki paidbah bad kyntiew ruh ïaka ioh ka kot bad ka iohkam iohjam.
U la ong ruh ba ka jingrakhe ïaka sngi ki nongri dohkha ka long ruh kum ka jingithuh halor ka jingtrei shitom jong ki ban kyntiew ïaka kam ri dohkha haka jylla kaba dei kawei naki thong jong ka sorkar jylla ym tang haki jaka sor hynrei sha ki shnong kyndong, kumba ka kam ri dohkha ka don ka bynta kaba khraw ym tang haka jingpynmih pisa, hynrei ban ïaid ïaka mariang, ka um ban khring ruh ïaki nongjngohkai pyrthei bad kumjuh kadei kawei naki lad iohjam iohjam khamtam ïaki khun samla ha kane ka juk ba mynta ba kin ïeng hala ki jong ki kjat bad lyngba ka State Aqua Culture Mission ka jylla haduh mynta kala lah ban pynmih ka dohkha kumba 18,435MT.
Naka liang u tei u ophisar sorkar u la ai ruh ka jingïaroh ïaki nongri dohkha haka jylla ban pynlong ïaka thong jong ka sorkar kaba jop bad seisoh, ha kaba u la kyrpad ruh ïaka tnad ri dohkha haka jylla ba kin don ka jingïatreilang kaba jan bad ki nongri dohkha ban dang kyntiew shuh shuh ïaka kam ri dohkha haka jylla.
Ha katei ka sngi ka jingrakhe ïaka sngi ki nongri dohkha la sakhi ruh da ka jingdonlang ka kong AL Mawlong Director ka tnad Fisheries ka jylla bad kiwei kiwei ki ophisar ryngkat ki nongri dohkha.
La pynphuh pynphieng ruh ha katei ka sngi da ki jingïakop khwai bad pynlait ïaka dohkha, volley ball, ïatan tyllai bad kiwei kiwei nalor ka jingïathir ïatai ban kyntiew ïaka kam ri dohkha bad la sam ruh ïaki khusnam sha ki 11 ngut ki nongri dohkha naki 11 tylli ki district ka jylla kiba la don ka bynta kaba khraw ban nohsynñiang bad kyntiew ïaka kam ri dohkha haka jylla.