Ba wiang ding pathar ki briew bym lah ban tip lait salit ka ïingshong briew na ka thylliej ding

Nongstoiñ K’lyngkot 29: Ka jingwiang ding pathar ïa ki lum ha West Khasi hills ka jur bha ha kine ki sngi khamtam naduh u bnai Nohprah haduh u bnai Lber bad haba ïaid kylleng ki jaka hapoh ka district lah ban ïohi bad sakhi ba ki briew kiba sngewtynnad ban thang dusmon ï kumba ki lum bad ki wah ki jyllei ha man la ki shnong.
Dang ha kane ka sngi Hat Majai jong kane ka taïew ha ka por kumba shiphew baje shiteng mynstep ki la don ki briew ki bym lah ban tip kiba wiang ding pathar ïa kawei ka jaka lum phlang ha ka shnong Mawlangdep kaba don harud ka surok bah National Highway 44(E) Shillong – Tura kaba jngai kumba 11 kilomitar shaphang sepngi na Nongstoiñ bad ha katei ka jingjia ka ïng jong ka kong Natalina Parïong ka la shu lait salit na ka thylliej ding kaba klang haduh syndah ïng.
Ha katei ka sngi katba nongthoh khubor u dang thmu ban leit jingleit u la poi ha katei ka jaka ha ka por ba ka thylliej ding ka dang klang bha bad ha katei ka por la mareh sha katei ka jaka ban ïarap lem ban pynlip ïa ka ding ba klang bad don bok ba ka lyer kam da jur than hynrei lada ka lyer ka jur yn ym lah ban leh ei.
Ha katei ka por ki don tang lai ngut ki kynthei uwei u shynrang bad arngut ki khynnah rit ha kaba ki la khynñiuh baroh shi rynïeng namar ka jing sheptieng katba ki arngut ki khynnah rit pat ki la phetrieh sha ka paiñkhana namar ba ki la sheptieng palat.
Ka jingdon jong ki briew kiba ju mlien ban wiang ding pathar ïa ki lum ka long ka jingma kaba khraw khamtam eh ïa ki ïng ki sem khamtam ha nongkyndong namar ba ki kmie ki kpa bad ki ba la kham san ki dei ki nongrep bad ki iehnoh ïa ki khun ba dang kham rit ha ïng kumta lada jia ba ka don ka jingpluh ding ïa ki lum bad poi ha ki ïng ki sem ka lah ban wanrah wat ïa ki jingjia ba sngewsih ruh.
Kumta ha kaba ïadei bad ka jingwiang dingpathar ïa ki lum ka la don kam ïa ki dorbar shnong ba kin pynsngewthuh sha ki pait nongshong shnong khamtam ïa ki rangbah kiba dih duma ba haba ki bret ïa ki kyndok jingpruid haba ki dih duma ki dei ban kynmaw ban da ïuh da ka kjat bad pynlip bad ruh haba ki bret ïa ki duma lyngkhot ruh ki dei ban kynmaw ba ki dei ban da kyrjaw da ka kjat namar ha kip or ba ryngkhiang bha u duma lyngkhot lane u kyndok jingpruit ruh lada ki ba dih duma kim phikir ha ka por ba ki bret ki phlang ki kynbat kiba la tyrkhong kin kem ding bad ka jingpluh ding ka jia.