Khliehriat naitung 10: Ka East Jaiñtia National Council, ka sengbhalang kaba la saiñdur na East Jaiñtia Hills District, hynnin ka sngi saitjaiñ ka la pynlong ïa ka prokram ba kyrpang ha kaba ka la rakhe kynmawburom ïa ka jingdap hynñiew snem ka seng, ïa ka prokram la pynlong ha Khliehriat West Community Hall ha kaba u bah Kyrmen Shylla, uba dei u MLA ka thaiñ bad uba dei ruh u myntri ka sorkar jylla u la long kum u kongsan ha kane ka sngi, kiba la ïa don lang ha kane ka prokram ki kynthup ruh u bah Damewanhi Rymbai, uba dei u kyrtong u ban sa ïakhun ïa ka MLA Election na ka 6- Khliehriat constituency, u President ka Jaiñtia Students Union, u samla Jersom shylla, u Finance Secretary JSU, u samla T.Mukhim, u President jong ka Jaiñtia Students Movement, u bah Leningstar Rymbai, ki riew rangbah na ki shnong bapher bapher, ki khun samla kiba dei ki dkhot ka EJNC na ki Circle bad ki Unit bapher bapher.
Haba kren kum u kongsan u bah Kyrmen Shylla u la ai ka jingkhublei kitbok kitrwiang ïa ki nongïalam bad ki dkhot ka East Jaiñtia National Council, kumjuh ruh ïa ki nongialam jong ki seng bapher bapher kiba la ïa don lang ha kane ka prokram, u la ong ruh ba dei tang da ka jingïatreilang ki sengbhalang bad ma u kum u nongmihkhmat yn lah ban kyntiew ïa ka district, u la kren ruh halor ki katto katne ki mat kiba donkam ki ban kyntiew ïa ki paidbah ka thaiñ, kum ka jingdawa college sorkar, ka jingïohkam ïohjam ki briew ka thaiñ ban trei ha ki karkhana dewbilat kiba don hapoh ka district bad kiwei kiwei ki mat.
Haba kren kyrpang ïa ka EJNC, u bah Kyrmen Shylla, u la ong ba kum ki nongialam ki dei ban long kiba ïaineh, kiba ïaishah bad u ai ruh ka jingkhublei kitbok kitrwiang ïa ka seng bad khmih lynti ruh ba ka EJNC kan ïaineh pateng la pateng ka ba lah ban ai ïa ka jingshakri ïa ka ri bad ka jaitbynriew.
Ha kaba ïadei bad ki mat ba la dawa da ki sengbhalang, kum ka jingdawa ban don ka college sorkar hapoh ka district bad kiwei kiwei ki jingdawa kiba donkam, u bah Kyrmen Shylla, u la kyrpad ïa ki nongïalam sengbhalang ba kin long kiba ïaishah bad ban ap ïa ka por namar ka por hi kan sa poi ba ki jingdawa kin sa wan urlong.
U bah Damewanhi Rymbai, u la kren shibbun ki mat kiba ktah ïa ka roi ka par, ïa ka ioh ka kot hapoh East Jaiñtia Hills District bad kum uwei na ki nongialam ba rim jong ka Jaiñtia Youth Federation, u la ai mynsiem bad pynshlur ïa ki dkhot ka EJNC ba kim dei ban tieng, kim dei ban ran dien haba ki ïeng na ka bynta ki hok jong ka ri bad ka jaitbynriew.
U President rangbah ka East Jaiñtia National Council, u bah Sambormi Lyngdoh u la ong ba hapoh kine ki hynñiew snem kum ki nongïalam bad ki dkhot, ki la mad shibun ki jingeh, jingtynjuh ha kiba bun ki liang “Hooid shisha kine ki hynñiew snem ki dang long kum ki jinghikai ïa ngi ba ngin sngewtuh kumno ban pynjanai shuh shuh ïa ka jingshakri jong ngi ïa ka ri bad ka jaitbynriew khamtam ban shakri ïa ka district jong ngi kaba dang sahdien ha kiba bun ki liang” ong u bah Sambormi Lyngdoh bad u la kren ruh shibun kiei kiei kiba ïadei bad ki mat kiba ka seng ka la ïeng bad ïaleh bad mih madan ruh ban ïeng ban ïada ïa ka ri bad ka jaitbynriew.
U President jong ka Jaiñtia Students Union, u samla Jersom Shylla, u kyntu ïa ki para dkhot sengbhalang ban long kiba peitngor bha ha ka jingrung jingmih ki mynder khnang ban ïada na ka jingwanrung kyrthep ki mynder, ha kajuh ka por u pynkynmaw ba ki la don bun ki mat kiba ka JSU bad ka EJNC ki ju iatreilang bad mih madan ruh.Kiba la ai jingkren ki kynthup ruh u President ka Jaiñtia Students Movement, u bah Leningstar Rymbai, u bah Moses Swer uba dei u riew rangbah na ka shnong Khliehriat East lem bad kiwei kiwei.
