Nongstoiñ, K’lyngkot 29: Ka Community Health Centre ha Mawthengkut ka la shakri katba ka don ka bor bad lah shikatta ki snem, long ka jingkyrkhu kaba khraw eh na ka bynta ki paidbah jong kane ka Civil Sub Division. Hynrei katkum ka jingïaid jong ka por bad ka jingdon briew, ka la donkam ban pynbha bad pynbiang shuh shuh ka jingshakri na ka bynta ki paidbah, namar kiba pang ba shitom bad donkam jingïarap kyrkieh, ki ïakynduh shibun ki jingeh na ka daw jong ka jingduna Doctor ha katei ka jaka sumar.
Katto katne ki nongshong shnong ki bym kwah ban pynpaw kyrteng ïalade haba pyntip ha u nongthoh khubor, ki la ong ba haba leit shim dawai na katei ka jaka sumar hap ban ieng laiñ da ki bun kynta. Haba la leit ban jurip ïa katei ka jaka sumar, la lap ba ki nongwan shim dawai ki duna haduh katta katta bad ki don tang kumba katto katne ngut kiba wan ha katei ka jaka sumar.
Halor ka jingduna Doctor ha katei ka jaka sumar la ïoh ban ïakren bad u bah S.Rynñiaw, u la ong ba na ka por sha ka por ki sengbhalang kiba treikam hapoh Mawshynrut ki la leit ban ïakynduh ïa ki heh sorkar ban dawa ba kan pynbiang Doctor ha katei ka jaka sumar, hynrei haduh mynta ka sorkar kam shym la sngap satia.
Haba ïakren bad ki nongshong shnong ha katei ka thaiñ, ki la ong ba lada la sorkar kam pynbiang ïa ki Doctor bad kiwei kiwei ki jingdonkam kum ka jaka sumar paidbah, ka jingduhnong ka long sha ki paidbah nongshong shnong, namar naduh ka rukom peit ïa ki nongpang ruh kam biang nalor kata ka rukom ai dawai ruh kam biang.
Ki la kam ruh ba haba leit phah check up, ki shu kylli ïa ka jingshitom bad sa ai da ki slip ban leit thied na shabar. Lada ka long kuntei kam don jingïapher lada shu leit sha ki Pharmacy ruh namar ka long mar katjuh.
Haba ïakren bad u bah S. Rongrin President uwei na ki riew rangbah, u la kubur ba ka long kaba shisha ba ki don shibun ki jingduna ha katei ka jaka sumar. U la ong ba ka la donkam ba ka sorkar kan phah Doctor biang sa kumba ar ne lai ngut, namar haba phai sha ka jingdon briew ha katei ka thaiñ ka la palat ïa ka lai phew hajar ngut. Kumta lada ki Doctor ki duna, kan buh ïa kiba pang ba shitom ha ka jingeh kaba khraw.
