Ka Meghalaya kaba la pawnam na ka jingdon bun ki jaka jngohkai pyrthei kiba tynnad haduh ba ka la khring wat ïa ki nongwan na kylleng ki bynta jongka pyrthei mynta ka donkam ban shim sa kawei pat ka sienjam kata ban ïakhun sa ïa ka jingbret jaboh pathar ki nongwankai ha ki jaka jngohkai bad khamtam eh ha shi lynter ka surokbah. Ym lah ban len bad yn ym don hi ruh kiba nud ban kyrngah lada kdew ïaka jingshisha ba lada leit sha ki thain Sohra ne kumjuh ha lynter ka surok na Shillong ban leit sha Mawlynnong, Dawki ne Nongpdeng ki don bun bha ki plastik chip bad ki bilor plastik kiba la shu bret pathar kumto da ki nongwan kai.
Mynta ka jingkylli ka long kumno ban ïakhun bad pynduh jait syndon ïa kine ki jingmlien khlem akor ba juleh da kito ki nongwan kai kiba sngew ba tang ba la lait na kali ne na ka kti lajong ka la biang. Kum ïa kine la sngewdei ban ai jingmut ïa ka sorkar jylla ba ka dei ban pynmih noh da ka hukum ba baroh ki kali kiba thmu ban rung sha ki jaka jngohkai pyrthei kim dei satia ban rah ïa ki bilor plastik, ki chip bad kiwei kiwei ki jingbam ba song plastik khnang ba yn ym don shuh iwei ruh ban bret pathar ïa ki jaboh plastik.
Da kaba leh kumne khlem artatien ka khubor kan phriang ba lada leit kai sha ki jaka jngohkai pyrthei ha Meghalaya phim dei satia ban rah ïa ki jingbam ba song plastik bad lehse kane kan ïarap ban rah ïa ka burom jong ka jylla ha kaba ki paidbah kin kham sngewtynnad pynban ban mad ïa ki jingbam ba die ha ki jaka jngohkai. Ym tang katta kane kan plie lad ruh ïa ki nongwan kai ban mad wat ïa ki jingbam tynrai kiba ki paidbah na ka jylla ka ju die.
Ha kawei ka liang pat, donkam ruh ban pynshlur ïa ki paidbah ka jylla kiba ju buh ïa ki dukan ha jan ki jaka jngohkai pyrthei ba ki dei katba lah ban buh da ki jingbam kiba ki nongwan kai ki sngewtynnad bad ki dei ruh ban pyrshang katba lah ban buh ïa ki jingbam kiba bha bad kiba dang thymmai khnang ba kan ym don kano kano ka jingkhnium na ki nongbam kampher la ki dei kiba wan na bar jylla ne ki dei ki trai jylla ruh.
Lada phai pat sha ka jingkhuid ha nongbah Shillong kaba dei ka jaka pdeng ba baroh ki nongwan kai ki sngewtynnad ban ïaid kai la sakhi ba ha ki khyndiat bnai ba la dep lada ïaid lynti ha kine ki jaka bad ki jaka ba marjan ki ju don beit ki plastik lane ki jaboh jabain kiba wit bad saphriang ha ki lynti syngkien. Hynrei naduh ba la kylluid la ïohi ba kine ki lyngkhot lyngkhai ne ki song plastik i kumba ki jah rngai lang. Lada ka long kumne i mat lah ban ong ba ka jinglehkhuid ka ïaid ryngkat ryngkat bad ka jingkylluid. Kumta lada ka long shisha kumne kylleng ki jaka paidbah khamtam ha shi lynter ka surok kali donkam ban pynkylluid noh khnang ba kin i khuid.
Haduh mynta hi lada kren ïa ka jingshisha ki nongwan jngohkai pyrthei haba ki wan sha Meghalaya ki kwah ban leit kai sha ki iew ki hat thik kumba long ki nongshong shnong ka jylla haba ki leit sha kiwei ki jylla ne shabar ri ruh kumjuh. Kumta ka long kaba i lehrain haduh katta katta lada jia ba ki nongwan jngohkai pyrthei ki tur sha Iewduh lane ki jaka ba marjan namar wat shwa ban rung shapoh la hap ïaid shwa na ki nur um ktieh, lane ki jaboh jabain kiba bun. Lada jia ba kito ki nongwan kai ki leit tang ha Khyndailad lehse dang lah ban da burom hynrei kan long pat kaba eh ban da burom lada jia ba ki kwah ban leit shaduh Iewduh kaba dei ka iew kaba pawnam bad kaba heh tam ha ka thain baroh kawei.
Kumta, halor kane ka bynta, ka la donkam kyrkieh ïa ki bor ba dei peit la ka long naduh ka Hima Mylliem, ka KHADC bad khamtam eh ka Sorkar Jylla kaba long kum ka Kmie ba kan peit ba ka jingpyntrei ïa ka skim pynkylla dur ïa ka Iewduh kan kham ïaid stet khnang ba kan ym kylla long ka jinglehrain ïa ka jylla lada jia ba ki briew kiba nabar ki kwah ban iuhkjat ha katei ka iew.
