525 tyngka shisngi ka dor bylla ba duna tam, mynjur ka Sorkar ïa ka Minimum Wage

Shillong, K’Lyngkot, 10: Ka sorkar jylla ha ka sngi Thohdieng ka la shim ïa ka rai ba ka bai bylla kaba duna tam (minimum wage) ha ka jylla ka dei 525 tyngka shisngi na ka 419 tyngka shisngi kaba ju treikam baroh shi katta na bynta ki unskilled ne ki nongbylla kiba ym pat da tbit.
Ïa kane la pyntip da u Myntri Rangbah ka Jylla Conrad K Sangma haba kren bad ki lad pathai khubor hadien ka jingïalang kaba nyngkong eh jong ka kynhun Myntri ban long ha Sohra.
Da kaba pyntip ba kane ka dor bai bylla ba thymmai ba ka jylla ka pynmih kan pynmyntoi ïa kumba 85000 ngut ki nongshong shnong ha ka jylla u Myntri Rangbah u la pyntip ba kane ka dor bai bylla na bynta ki semi skilled pat ka la poi mynta sha ka 565 tyngka shisngi na ka dor ba 474 tyngka shisngi.
U la pyntip ruh ba na bynta ki skilled pat la kyntiew sha ka 605 tyngka na ka dor ba 530 tyngka ka dor ba rim. Bad na bynta ki high skilled pat u Myntri Rangbah u la pyntip ba ïa ka dor bai bylla la kyntiew sha ka 645 tyngka shisngi na ka dor ba rim kaba long 586 tyngka shisngi.
Haba jubab halor ka jingkylli, u Myntri Rangbah u la ong, “Ngi kwah ban ïohi ba ki nongai kam kin pyntreikam ïa ka dor bai bylla kaba thymmai.” Nangta u kyntu ruh ïa ki nongbylla ba kin phah ïa ki jingujor sha ka tnad Labour lada don ki bym pyntreikam ïa kane ka jingbthah ba thymmai.
U Myntri Rangbah u la pyntip ruh ba ka Kynhun Myntri ka la mynjur ruh ban pynkylla thymmai ïa ka The Meghalaya Buildings and Other Construction Workers Regulation and Employment Condition Rules, 2008 ha kaba la kyntiew shuh shuh ïa ka song jingkyrshan pisa sha ki nongbylla kiba rejistar bad ka sorkar.
Katkum ka jingong jong u, ka ju don ka labour cess kaba ju lum bad dei na kane hi ka pisa ba la pynlut ban ai pat sha ki nongbylla kiba la rejistar la ka long na ka bynta ba kin kyrshan skul, shah sumar bad kiwei kiwei ki jingmyntoi.