Mawkyrwat, Naiwieng 03 : Ki Pulit jong ka Ranikor Police Station ha ryngkat ka jingïatreilang bad ki Special Cell jong ka Mawkyrwat Police Station ki la ïoh ban kem ïa ki 5 ngut kiba suba ‘riew kieng atair jong ka senglehnoh Garo National Liberation Army Regroup (GNLA-R).
Katkum ka khubor na u Bah B. Jyrwa, MPS, Superintendent of Police ka South West Khasi Hills District u la ïathuh ba ka jingïoh ban kem ïa ki 5 ngut kiba la suba ba ki dei na ka Garo National Liberation Army Regroup (GNLA-R) ka dei lyngba uwei u nongkhaïi uba ujor ejahar ha Nonghyllam Police Station ha ka 28 tarik u Risaw, 2025 hadien ba u la ïoh ka shithi dawa pisa kumba T. 5 lak tam bad hadien kata u la shah byrngem ruh lyngba ka phone
Ym tangkata, ula ong ruh ba ha kaba ïadei bad katei ka jingjia ki pulit jong ka Ranikor PS ryngkat ki Special Cell jong ka Mawkyrwat PS lyngba ki jingïoh jingtip kiba biang, ki la ïoh ban kem ïa uwei u briew uba suba donkti ha katei ka kam bad ki la ïoh ban kem ïa u Mann R. Marak uba 25 snem karta na ka shnong Upper Rajapara, South West Khasi Hills.
Hadien ka jingtohkit, u Mann R. Marak u la phla sa ïa kiwei pat kiba donkti bad ki puit ki la ïoh ban kem saw ngut kynthup ïa uwei u khynnah rit bad kiwei pat ki kynthup ïa u khynnah ba dang 18 snem na Upper Rajapara, u Tartus N. Marak, 20 snem na Mulapat, u Babulin D. Sangma, 27 snem na Upper Rajapara bad kine baroh kiba la shah kem ki dei na South West Khasi Hills District.
Ha kaba ïadei bad kane jingjia, ki pulit haduh mynta ki dang pynlong ïa ka jingtohkit ban pynthikna ba kine baroh ki dei ne em ki dkhot jong a GNLA-R.
Halor kane na ka liang ki pulit ki la dep ban register mokotduma ha Nonghyllam Police Station halor ki kyndon aiñ no.15 (10) 25 U/S 308 (2)/351(4) /3 (5)/113 (3) (5) BNS.
