Nongpoh, Ïaiong 03: Haba leit ban shim bynta ha ka jingdap 50 snem jong ka All Meghalaya Karbi Association ha Purduwa, Ri-Bhoi District u MLA ka Nongpoh mynta ka sngi u la aiti syndon da ka song pisa kaba 5 lakh tyngka ban shna pynbha ïa ka Auditorium jong ka AMKA kaba don ha ka shnong Umwang bala mang pisa lyngba ka Chief Minster Special Development Fund.
Haba kren ha katei ka sngi u la ai ka jingïaroh ïa ka kynhun ki karbi kiba lah ban pynneh ïa ka jinglong kawei ha baroh kawei ka jylla hapoh ka lama jong ka All Meghalaya Karbi Association bad kyntu ruh ïa ki ba ki dei ban dang pynskhem ïa ka jinglong kawei, ka jingïeid bad ka jingtylli na ka bynta shibun ki kam ki jam ban dang kyntiew ïa ka jaitbynriew karbi hi baroh kawei.
U la ong ruh ba ki don shibun ki jaitbynriew kiba la klet la ka jong ka tynrai ka ktien ka thylliej, hynrei kumba long ki Karbi ki dei kiba riewspah naduh ka kolshor tynrai, ka riti ka dustur, ka riam ka beit bad khamtam ka jingtylli jong ki ban kyntiew shakhmat bad shaphrang ïala ka jong ka jaitbynriew.
