Shillong, Lber 10: Ka 19 South Shillong Konstitwensi ka la long kaba donbok napdeng kiwei pat ki konstitwensi kaba la ïoh ïa ka mang tyngka kaba T. 5 klur ban shna bad buh ïa u phlang plastic ne artificial turf hapoh madan Laban nalor kiwei pat ki jingtei.
Kane ka konstitwensi ka la rung lang hapoh ka jingmang pisa jong ka sorkar jylla ban maramot ïa ki madan ïalehkai kiba ka la buh ka mang tyngka kaba T. 42,61,31,100. 00 kaba dei ruh na ka State Plan Assistant bad na kane ka pisa ka South Shillong Konstitwensi ka la ïoh ka jingmang pisa kaba T. 5 klur bad ïa kane ka kam la tyrwa bad sdang hi da u MLA u Bah Sanbor Shullai naduh u snem 2021 ha ka por ba u dang long u Myntri ka tnat Arts and Culture bad ba u Bah Banteidor Lyngdoh u la long u Myntri ki Kam ïalehkai.
Haba leit jurip ha ka sngi Saitjaiñ ïa katei ka madan Laban kaba la iaid ka jingpyntrei ïa ka kam u Bah Sanbor uba long ruh u Chairman ka MTDC u la ïathuh ba nalor ka konstitwensi jong u, ka Madan ha Shangpung Pohshnong, ka Laitlyngkot, ka PWD Ground Mawsynram bad Umbudda kiba la rung lang ha katei ka T. 42 klur tam.
U la ai khublei ïa ka sorkar jylla naduh u Myntri Rangbah u Conrad Sangma, u Symbud Myntri Rangbah u Bah Prestone Tynsong, u Myntri kam Lehkai ba mynta u Bah Shakliar Warjri bad u Myntri barim u Bah Banteidor Lyngdoh, Director Sports and Youth Affairs ki ophisar ka State Sports Council nalor ki ophisar kiba la donlang ha kane ka jingjurip, ki Nongïalam shnong bad ka seng kynthei bad seng samla ka Laban.
U la ïathuh ba ha kane ka madan phlang plastic, yn don ruh ki Rest Room, Changing Room bad kiwei bad la buh ban pyndep hapoh ki 24 bnai.
Ïa kane ka madan kumba la ïathuh da u MLA u Bah Sanbor Shullai yn khmih bad ban sumar sukher da ka Dorbar shnong Madan Laban Rait Laban, ka Seng Longkmie bad ka seng samla ka shnong Laban.
