5.58 klur ïoh bailutksan ka Hima Mylliem, ujor ki Myntri bym wanrah u Syiem ha ka Dorbar Pyllun

By Mawphor Editor On Jul 3, 2024

Shillong, Naitung, 02: Katto katne ngut ki Myntri jong ka Hima Mylliem ki la ujor sha ka Khasi Hills Autonomous District Council halor ka jingkynnoh leh sop sop jong u Syiem u Pa’iem Ainam Manik Syiem ha kaba ïadei bad dulir pynskhem khyndew jong ka Iew Mylliem rim, Hima Mylliem bad ka jingbym lum ïa ka Executive Dorbar bad ïa ka Dorbar Pyllun jong ki Bakhraw Batri ban pyntip paidbah halor ka pisa kaba kot T.5,58,30,451 klur ba la ïoh na ka jingsiew bailutksan da ka Sorkar ban pynheh ïa ka surok Shillong-Dawki.
Shwa kane, ki Myntri ki la phah sha ka KHADC ïa ka ujor banyngkong ha ka 21 tarik, Risaw, 2023 bad ïa ka jingbishar kam arliang manla la pynlong ha ka sngi Baar ba la pynbeit da u Dy.CEM ka KHADC uba khmih ïa ka tnat Elaka u Bah Pynshngaiñ N. Syiem ban tohkit bniah halor kine ki jingujor jong ki Myntri pyrshah ïa u Syiem.
U Myntri B.N Shanpru ha ka jingïakren bad ki nongthoh khubor u la kynnoh ba ka jingleh kyrkieh jong u Pa’iem Ainam Manik Syiem ban ai dulir pynskhem khyndew ïa ka Raid Mylliem khlem da ïoh jingbit na ka Dorbar Hima Mylliem ka long ka jingleh donbor bad ka jingdie be-aiñ ïa ka khyndew Hima kaba la kdew shai ha ka Rule 2 (37) jong ka Administration of Mylliem Syiemship Rule, 2015 bad ka jingpynkheiñ ïa ka kyndon 7 (e) jong ka Mylliem Act, (Mylliem Syiemship Act, 2007 bad ïa ka Rule 12 jong ka Administration of Mylliem Syiemship Rules, 2015.
U la ïathuh ruh ba ha ka jingujor kaba nyngkong sha ka KHADC, la mudui pyrshah ïa u Syiem Ainam hapoh ka Section 7 (c) bad 7 (e) jong ka ‘The Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship), Act, 2007 bad katkum ka aiñ jong ka Sorkar Pdeng kaba ïadei bad ka Right to Fair Compensation and Transparency in Land Aquisition, Rehabilitation and Resettlement Act, 2013.
“Ka jingujor pyrshah ïa u Syiem bad ïa ki katto katne ngut ki Myntri ka long ba ngi ïohi ïa ki kam bad kim long kiba ïahap bad ka riti ka dustur bad ka synshar ka khadar. Ka jingujor ka long ruh halor ka jingpynduh bai rneng ïa ki Myntri da u Syiem kaba paw ruh kum ka jingleh donbor. Ngi sngewsih ban ïathuh ba ka jingsynshar jong u Syiem Ainam ka long palat na kaba palat liam namarba ïa ka dorbar ruh um ju khot tikna bad katkum ka rul ba dei ban khot shisien shisnem hynrei kata ruh um ju khot,” u la ong.
“Ka jngkheiñ jingdiah ha ka Hima dei ban ai shisien shisnem hynrei mynta la hynriew snem u Syiem um pat ai jingkheiñ wat tang shisien ruh. Kane ka dei kaba sngewsih tam namarba ïa ngi la jied da ki Kur bad ngi mihkmat ha ka Hima ban tip ïa ka jingpyndonkam ïa ka pisa pilaiñ bad ïa ki rukom treikam hynrei ïa kata ruh ngim don jingtip namarba ym don jingkheiñ jingdiah namarba um (Syiem ju khot ïa ka dorbar,” la ong shuh shuh u Myntri Shanpru.
“Ha kaba ïadei bad ka khyndew ka shyiap, ka long kaba sngewsih ba u Syiem u leh khlem da khot ïa ka Executive Dorbar bad ka Dorbar Pyllun khamtam ïa ki kam kiba heh kiba ïadei bad ka Mylliem bad kiwei kiwei kiba ngi la ujor. U leh khlem ka jingpyntip lang. Ha ka jingshisha kane ka dei ka ri synshar paidbah, ka synshar lang bad ngi dei ban tip lang haba leh ïa kano kano ka kam hynrei u leh khlem kano kano ka jingpyntip lang ïa ngi,” ong u Myntri Shanpru.
“Ka jinglum jinglang kam ju don hynrei na ka liang jong u Syiem u shu pynsngewtynnat tang ïa kito katto katne ban pyntyllun ïa ka kam. Ngi la aiti ka jingujor bad ka shong ha ka KHADC kaei ka ban bishar bad kan sa don biang sa kawei pat ka jingbishar kam bad ngin ïai ap biang ïa kata. Ïa ka ujor ngi la kdew ruh katkum ka rul jong ka Mylliem Act. Ngi kyrmen ba kane kan ym shlem shuh,” u la ong.
Kiwei pat ki Myntri ki la bynrap ruh da kaba ong, “halor ka jingioh pdiang ïa ka bai lutksan na ka liang jong u Syiem u dei ban tip kham bha namarba u dei u Syiem uba synshar ha ka Hima. Hadien ba la ioh ïa ka bailutksan na ka bynta ka Raid Mylliem um shym la pyntip ïa ka Dorbar baroh kawei bad ïa ka rai la shu shim hi tang da u Syiem bad ki katto katne ngut ki Myntri. Kino kino ki jaka kiba hap hapoh ka Raid ka dei hi ka synshar ka khadar jong ka Hima.”