Shillong, Risaw, 02: Ka jingtyrkhong um ha ka shnong Mawkhar, Jaïaw, Riatsamthiah, Wahingdoh bad ha kiwei de ki shnong kiba hap hapoh ka North Shillong Constituency ka la wanrah ka jingsngewkhia kaba jur ïa u MLA u Bah Adelbert Nongrum bad kynthup ruh ïa ki nongshong shnong.
Kane ka Constituency ka bym ju kham jia koit ban mad than ïa ka jingkyrduh um, lait noh ha ki por tlang, hynrei mynta la kumba katto katne sngi ki paidbah nongshong shnong ki la mad ïa ka jingduna bha ka jingsam um na ka tnat PHE bad na ka Shillong Municipal Board.
Ha kaba ïadei bad kane u Bah Adelbert u la kyntu ïa ka tnat PHE bad ïa ka Shillong Municipal Municipal Board ban peit ba balei ka um ha ka Constituency kam mih bad ki don ki jaka kiba ka um ka biang bad ki don ki jaka ba ka jingwan jong ka um ka duna bad kam mih satia
“Nga pyntip lyngba kane ka khubor bad nga ngeit skhem ba na ka liang jong u Myntri ka tnat PHE ban tuklar lem kaei ka daw ba na ka por sha ka por ki paidbah kiba hap ban shah. Mynta la saw sngi, ki don ki jaka ba ka um kam shym la mih. Ki tnat ba dei peit ki dei ban shimkhia halor kane ka jingeh ba ki paidbah ki ïakynduh nalor ba ki paidbah ki pyndep hok ban siew ïa ka khajna um bad na ka por sha ka por ban aidaw ba dei na Mawphlang yn nym lah ban pdiang,” ong u Bah Adelbert da kaba bynrap ruh ba ki Tnat ba dei peit ki dei pyndep hok ïa la ka kamram da ka jingkitkhlieh.
