3×3 Open Basketball Championship : Lahduh ka Diphu Mavericks na ka thup shynrang, ka Shillong Labet na ki kynthei

Shillong, Nailur 11: Hynnin ka Sngi U Blei ka Salescian Youth Movement ka la ïoh ban pynkut noh ïa ka lympung lehkai Basketball kaba lai sngi lynter ïa kaba kla tip da ka 3×3 Open Basketball Championship ha kaba ïa ka namlahduh ha ka thup jong ki shynrang la khur da ka Diphu Mavericks, katba ka Shillong Labet ka la ïohrah na ka thup jong ki kynthei.
Kumban shu pynkynmaw, ïa kane ka Championship la ïoh ban sdang naduh ka Sngi Thohdieng jong ka taïew ba ladep bad ki la don haduh 32 ngut ki nongïashimbynta na ki shynrang katba ha ka thup ïakhun ki kynthei ki la don 14 ngut.
Ha kane ka sngi, la ïoh ban pyntyllun ïa ki jingïalehkai naduh ka quarter, semi bad ka final, bad napdeng ki kynthei kiba la ïoh ban rung sha ka wat kaba khadduh ki long ka Shillong Labet pyrshah ïa ka Bengal Tigresses, Kolkata (Women), bad ka Diphu Mavericks pyrshah ïa ka Mount Carmel, Aizawl (Men).
Ki thei ka Shillong Labet, Shillong ki la pynliem da 12-11 basket point ïa ka Bengal Tigresses, Kolkata kaba wan ba ar (1st Runner Up).
Ki thei ka SYM Mavericks, Shillong ki la wan ha ka kyrdan ba lai (2nd Runners Up).
Ha ka final jong ki shynrang, ka Diphu Mavericks ka la pynliem ïa ka Mount Carmel, Aizawl da 21-20 ban rah ïa ka namlahduh. Ka UBC, Guwahati ka la wan ha ka kyrdan ba lai.
La ïoh ruh ban sam khusnam sha ki player kiba kynsai lane Most Valuable Player jong kane ka Championship, napdeng ki kynthei, ïa kane ka khusnam la khur da ka Ucilia Pyngrope jong ka Shillong Labet, katba napdeng ki shynrang la khur da u Zomuna jong ka Diphu Mavericks.