38.50 klur pan jingmynjur u Myntri Rangbah hapoh ïing Dorbar ban siew ïa ka bhah ki District Council

Shillong, Nailar 25: U myntri rangbah ka jylla u Cornad K Sangma ba dei peit ruh ïa ka tnad marpoh khydnew u la pan pisa shuh na ka ïing dorbar sa 38,50,15,584 tyngka na ka bynta ban siew ïa ka bhah jong ki District Council kiba don ha ka jylla.
Kane ka pisa ka dei ka bhah kaba ki District Council kin ïoh na ka sorkar na ka jinglum ïa ka musur namar ki marpoh khyndew kiba la pynlum da ka sorkar bad kum juh na ki kali kiba dei ka bynta jong ki District Council.
Na katei ka pisa kaba la pan na ka ïing dorbar ka KHADC kan ïoh T.20,14,08,278/- klur tyngka, ka JHADC kan ïoh T.8,69,86,306/- klur tyngka, katba ka GHADC kan ïoh T.9,66,21,000/- klur tyngka.
Kane ka jingpan u myntri rangbah ka jylla ïa kane ka pisa na ka ïing dorbar ka long ban ai sha ki District Council kaba dei ka bhah ka jong ki ka bai musur na ka bynta u snem mang tyngka 2024-2025.
Ha ka juh kapor u myntri rangbah ka jylla u la pan pisa shuh na ka ïing dorbar T.4,60,00,000/- klur tyngka bad kane ka long ban pyntrei da ka Meghalaya Zoo Project Implementation Society kaba ka jingtrei ka dang ïaid mynta ha Ri Bhoi District.