Shillong, Lber 21: U Myntri Rangbah ka jylla u Conrad K Sangma mynta ka sngi ba-ar ula ong ba ka jingjied biang ki paidbah ka jylla ïa ka sorkar synrop Meghalaya Democratic Alliance (MDA) ka pyni ba ki paidbah ki la jied hadien ba la phrang ha ka ding ne ka jingjop kaba khraw hadien ba la mad ïa ki jingeh jingtynjuh bad jingkynnoh ba harrukom (Agni Pariksha 2023)’.
“Ki paidbah ka jylla kila jied ïa ki party ba don hapoh ka MDA bad kane pyni ba ki paidbah ki la jied ïa ka ‘Agni Pariksha’ naka bynta ban jop ïa ki jingeh kiba bun” la ong u Conrad.
Haba kyntait ban kren halor ka jingkren u Myntri Rangbahduh ka ri India Narendra Modi, naka liang u Conrad ula ong “Ngi la dep kren ïa kiei kiba donkam ban kren ha ka por ïalap elekshon, wat ki paralok kiba don lang hapoh ka sorkar MDA ruh ki la kren pyrshah ïa ngi hynrei ki paidbah ki la jied bad mynta ki kwah ba ka sorkar kan long kaba trei na ka bynta baroh”.
Haba wanrah ka jingïatai ba lyngkot, u MLA ka VPP na North Shillong bah Adelbert Nongrum ula ong, hato u Myntri Rangbah duh bad u Myntri ka tnat kam pohïng ka ri India ki khlem pyrkhat ha shuwa ban kynthoh ba ka Meghalaya kadei ka jylla ba bamsap tam hapoh ka ri baroh kawei.
“Hato kum ki nongïalam ba hakhmat eh, kin kren ne kynthoh khlem da don ka jingtip ba kham bniah haba ïadei bad jingpyndonkam bakla ïa ka song pisa ba ai ka sorkar pdeng sha man ki sorkar jylla bad lada kane ka jingkynnoh ka dei kaba bakla, kadei ka kamram jong ka sorkar jylla ban jubab tyngeh shaka sorkar pdeng, halor ka jingkynnoh”.
Halor kane, u Myntri Rangbah ka jylla Conrad K Sangma, ula pyntip hapoh ka ïingdorbar halor ka jinglah ka sorkar MDA ban pyntrei ïa ki skhim sorkar pdeng khamtam halor ka Jal Jeevan Mission (JJM), ka PMGSY bad kiwei kiwei de.
“Kine baroh kidei ki sakhi sabut ba ka Meghalaya ka la trei bha namar ka dei hi ka sorkar pdeng kaba la ai syrnod” ula ong.
“Kadei ka jingshisha ba hapoh ka sorkar MDA 2.0, ka BJP ruh ka don lang bad wat ha ka por bam smai bad shimti ïa ka sorkar thymmai, u Myntri Rangbah duh bad u Myntri ka tnat kam pohïing ki la wan sakhi lang bad kane ka kdew shai ba ka sorkar pdeng ka ïohi ïa ka jinglah ka sorkar MDA ban trei bha” ula bynrap.
Haba pynkynmaw ba ka ‘agni pariksha 2023’ kala kut, u Conrad ula ong kadei ka kamram jong baroh ki nongïalam ban trei na ka bynta ka jingbha ki paidbah bad ka jylla baroh kawei ban pynlong ïa ka Meghalaya kum ka jylla ba hakhmat eh.
Haba shim bynta ha ka jingïatai u Dr. Mukul ula kam ba ka bamsap ka lah ban pyndkhoh ïa ka jylla bad kan ktah ïa ki pateng kiban wan bad dei namar kane ym dei ban kheiñ sting ïa ka jingshah kynnoh bamsap bad dei namar kane ka sorkar kadei ban shim da ka Resolution halor kane.
“Ngim dei ban ban kheiñ sting ïa ka jingshah kynnoh bamsap bad dei namar kane ka sorkar ka dei ban shim da ka Resolution halor kane bad dei ban kyntu ïa ka sorkar pdeng ban pyni ïa ki dak bad ka sorkar India ka dei ban leh ïa kaba donkam ban tohkit halor kita ki kam bamsap khnang ba ka jylla kan lait na ka jingshah pynrem kum ka jylla ba bamsap” la ong u Dr. Mukul.