300 akar thied jaka ka MIDC ha Umsiang, kynnoh ka CoRP shu ai NoC sopsop ki RS bad u Syiem

Nongpoh, Ïaïong 01: Tang hadien ba la ïoh jingtip ba ka Meghalaya Industrial Development Corporation (MIDC) ka la leit ban thied jaka sop sop ha ka thaiñ Umsiang ba hap ha khappud ka Meghalaya bad ka Assam ha Ri Bhoi District, ka Confederation of Ri Bhoi People (CoRP) ka la mih shakhmat ban pyrshah jur ba da lei lei kan nym ailad ba ka MIDC kan shu thied jaka sop sop khlem da pyntip sha u paidbah.
Haba kren sha ki lad pathai khubor, u Working President ka CoRP, u Bah Pateng Myrsing, u la ong ba ka seng kan pyrshah jur ïa kane ka jingwan thied jaka sop sop ka MIDC kaba la kot shaduh ka 300 akar bad ha ka jinglut kaba la kot sha ka 100 klur ba la shu leh sop sop ban ai NOC tang da ki Rangbah shnong bad u Syiem.
U la ong ruh ba ka seng kan ieng skhem ban pyrshah jur ha kaba kan nym ailad ïa kine ki kam thied jaka tuh khlem da burom shuh ïa ka sur u paidbah bad kane ka jingwan thied jaka ka MIDC sha katei ka thaiñ Umsiang ka dei ruh hadien ba ki paidbah ka Byrnihat ki la pyrshah jur ban pynkylla kum kata ka jaka ki karkhana ha Soil and Water Conservation Byrnihat.
“Ngi la dep mat ka jingdon ki Karkhana bad ha Umïam kam ai satia ka jingmyntoi ïa ki trai jylla bad ka jingmyntoi ka leit sha ki bar jylla bad kaei kaba ki paidbah trai jylla ki mat ka dei kumba long ha Byrnihat kaba la ïoh ïa ka nam kum kata ka jaka ba jaboh tam ka lyer ha ka pyrthei” ong u Bah Myrsing bad bynrap ruh ki paidah katei ka thaiñ Umsiang ruh kim dei ban shu beij ha kaba mynta ki dang ïoh ïa ka lyer bad ka mariang kaba khuid bad la jin ba kin wan ki Kharkhana kan nym pher kumba shah ktah ki paidbah ha Umïam bad ha Byrnihat” u la bynrap.
U la ong ruh ba ka seng ka kyrpad ïa ki paidbah ba ïa kyrshan lang halor kane ka jingpyrshah ka seng ïa ka jingthied jaka ka MIDC, namar lada wan kita ki Karkhana ki paidbah kin nym ïoh jingmyntoi satia ha kaba wat ki kam ki jam ruh kin bun kiba wan na shabar bad katba ki trai jylla pat ki long tang kita ki nongshah ktah kumba la shah ktah ha Byrnihat.
Namarkata, u la bynrap ruh da kaba ong ba ka seng kan pyrshah jur bad ïa mynta ngin dang ap ïa ka jubab ka RTI ba la phah sha ka MIDC bad hadien ba la ïoh ïa ka jubab RTI ka seng kan sa dang pynshai shuh shuh sha ki paidbah ban ïa pyrshah bad ruh ka seng ka dawa na ka sorkar ba kan sangeh ban thied ïa katei ka jaka lyngba ka MIDC ha katei ka thaiñ Umsiang, u la bynrap.