2nd Division WJDSA : Jam ka Lion SC sha ka semi final hadien ba jop ïa ka Iawmulong
![](https://mawphor.com/wp-content/uploads/2022/04/Sports-750x430.jpg)
Jowai, Nailur 13: Ka jingïalehkai phutbol bala tip kum ka 6th Debo Shullai Memorial Trophy jong ka kyrdan 2nd Division Football Tournament 2023 bala pynïaid da ka West Jaiñtia District Sports Association (WJDSA) kaba la long hynne ka sngi Balang ha madan Kiang Nangbah Stadium, Dongmihsngi Jowai.
Ka kynhun ïalehkai jong ka Lion SC ka la ïoh ban buh jaka ïalade ha ka semi final hadien ba ka la khur ïa ka namjop ha ka ‘Quarter Final’ kaba kaba la long pyrshah ïa ka Iawmulong Nartiang.
Ha phai sha kane ka jingïakhun, kaba dei ka quarter final ba nyngkong jong ki phra kynhun ba dang sah ha kane ka lympung, ka Lion SC ka la pynjemkhnap ïa ka Iawmulong Nartiang da kaba thep haduh 3 kol kaba la biang pura ïa ka kynhun ban bteng ïa ka lynti ïaid sha ka semi.
U Chanmitre Dkhar u la ïoh ban khyrwit ar kol na ka bynta ka kynhun kiba la wan ha ka minit ba 22 & 77 katba ka shi kol pat la thep da u Banteibor Syngkrem haka minit ba 59 jong ka kylla kaba ar.
Na ka liang jong ki nongpynïaid ki la pynbeit ban pyntyllun biang ïa ka jingïakhun Quarter Final mynta ka sngi, ha kaba ka Shangpung Khliehmuchut kan aireng pyrshah ïa ka Khliehmynkrem. Nangta ha ka 15 tarik, Nailur, ka Maitchaphrang Mootyrchiah kan ïakhun pyrshah ïaka Chutwakhu. Katba haka 16.09.2023 ka Lumpariat pyrshah ïaka Mooknor Thadmuthlon ha ka jingïaknieh ban ïohrung sha ka semi final.