Plie pyrda u DSO ïa ka District Level Volleyball Tournament 2023
Wan ïashimbynta 13 tylli ki kynhun shynrang bad 4 kynhun ki kynthei.
Mawkyrwat, ‘Nailur 13: Ka ophis jong u District Sport Officer (DSO) jong ka South West Khasi Hills District ryngkat ka jingïatrei lang bad ka South West Khasi Hills District Volleyball Association (SWKHDVS) ki la ïoh ban plie pyrda ïa ka District Level Volleyball Tournament 2023 hajan jong ka madan MDSA, Nonglang, South West Khasi Hills.
Ïa kane ka District Level Volleyball Tournament 2023 la wan ban plie pyrda da u bah Damang Syngkon, District Sports Officer (DSO), South West Khasi Hills District uba long kum u kongsan.
Ha kane ka lympung ïalehkai jong ka District Level Volleyball Tournament 2023 ki la don kumba 13 tylli ki kynhun ïalehkai na ka liang ki shynrang bad 4 tylli ki kynhun na ka liang jong ki kynthei.
Haba phai ha ka jingïalehkai, ki kynhun ïalehkai kiba la ïoh ban ïalehkai sdang ki shynrang ki long ka Tynnai Sports Club pyshah ïa ka Mawkyrwat SA, ka Mawranglang Laikyntoit pyrshah ïa ka Mawlangwir Sports Club, ka Nongpdeng Kynbah Sports & Cultural Club pyrshah ïa ka Mawthawiang Nongtraw Sports Club bad na ka liang ki kynthei pat ka Mawranglang Laikyntoit A pyrshah ïa ka Mawkyrwat Sports Association.
Nalor u kongsan uba la ai jingkren, halor ka jingthmu ban pynlong ïa kane ka lympung ïalehkai Volleyball lyngba ka Scheme Rural Sports jong ka sorkar Meghalaya na ka bynta u snem 2021-22 kum shibynta ba ïoh jied ïa ki ‘rang bad ki ‘thei kynsai ban mihkhmat na ka District ban ïoh leit ïashimbynta ha ka Meghalaya Game kaba ban long shen ha Nongbah Tura ha u bnai Nohprah jong u snem 2023. La ïoh ban ai ki jingkren lyngkot na u bah Elevenson Wanniang, President jong ka South West Khasi Hills District Volleyball Association.
Kiba la ïadonlang ruh u bah Bankyrshan Lartang, u bah Forwardman Nongrem, u bah Blosdingwel Wanniang kiba dei ki nongkitkam jong ka Volleyball Association bad kiwei de ki dkhot na ka ophis jong u DSO Mawkyrwat.