Shillong, Nohprah 14: Ka kynhun kynjatbol jong ka Nongrah SC kaba ïalehkai ha ka lympung kyrdan 2nd DIVISION Football League 2023 ba la pynïaid da ka Shillong Sports Association ka la thaw rekod da kaba thep haduh 17 kol ha ka jingïakhun kaba long pyrshah ïa ka Imson SC hynne ka Sngi Palei ha madan SSA Ground.
Hynne ka Sngi ki la don ar tylli ki jingïakhun ha ka kyrdan 2nd Division bad la sdang nyngkong ïa ka jingïalehkai hapdeng ka Imson SC pyrshah ïa ka Nongrah SC ha ka por 11:30 baje mynstep nangta kaba ar ha ka por 2:15 baje nohphaisngi hapdeng ka Sohiong SC pyrshah ïa ka Jongksha SC.
Ha ka jingïakhun kaba nyngkong, ka Imson SC ka la shah pynjemkhnap ha ka Nongrah SC haduh 17 kol, ha kaba u wei na ki player jong ka Nongrah, u Dawandapura Pathaw (10,15, 22, 28, 68 & 85 minit) u la ïoh ban thep ar tylli ki hat trick (hynriew kol).
Kiwei pat ki kol la wan lyngba u Kynsaibor Wankhar (12 min), u Dameshanbor Gashnga (27 min), uJonas Nongbri (36 & 45 min), u Shanbok Marboh (47 & 71 min), u Ronnie Pyngrope (63 min), Blanang Khongsdam (64 minit), u Sondingroy Rngaid (75 & 77 min), u Nangtei Kharlukhi (81 min).
Ka daw ba la pynïoh ïa Nongrah SC ban ïoh khyrwit haduh 17 kol ha kane ka jingïalehkai ka dei namar ba ka kynhun liang pyrshah, kata ka Imson ka ïalehkai da tang 7\8 ngut ki rangïalehkai haduh kaba kut jong ka por, bad lyngba kane, ka Nongrah ka la shim kabu ban pynbam haduh 17 kol.
Haba phai pat sha ka jingïakhun kaba ar, ka Sohiong SC ka la khur ïa ka namjop da 2-0 kol pyrshah ïa ka Jongksha SC.
Ka Sohiong SC ka la ïoh ban thep nyngkong ïa katei ka shi kol dei lyngba u Banshemlang Janong ha ka 20 minit bud sa ka kol ba khadduh na u Keystar Malngiang ha ka minit ba 75 jong ka kylla miet.
La pyntip ba mynta ka sngi kan don tang kawei ka jingïakhun jong ka lympung 2nd Division ka ban sdang ha ka por 2:15 nohphaisngi hapdeng ka Umphrup SC pyrshah ïa ka Lumshyiap SC.
