Nongpoh, Nohprah 14: U President ka Petroluem Dealers Association of Meghalaya (PDAM) Bah Kennedy C. Khyriem ha ka sngi Palei u la kren da kaba shai ba ka Association kan trei borbah ban pynduhjait ïa ka jingtuh umphniang na ki Kali kit Umphniang Petrol ha ka surokbah National Highway bad kynthoh tyngeh ruh ba kane kam dei shuh kam tuh ka barit bad ka dei ka kam tuh kaba la kot da ki phew klur tyngka ha ka shisnem.
Ha ka jingïakren bad ki lad pathai khubor hadien ba la wai ka jingïalang kaba la long ha Nongpoh ba la pynlong da ka sorkar Meghalaya ryngkat bad ki nongïalam ka Mazdoor Union, u Bah Kennedy u la ong, “lada kheiñ tang da ki jingshah tuh kaba tang da ka 50 litar shi sngi bad lada kheiñ kyllum kan poi sha ka 27 klur ha ka shi snem, namar lyngba kane ka surok ha ka shi sngi ym duna ki Kali kit umphniang petrol kiba ïaid kumba 400 tylli ban shalan umphniang sha ka jylla Meghalaya bad kiwei ki jaka kum sha Silchar, Hailagandi, Karimganj, Tripura, Mizoram bad kiwei kiwei ki jaka.”
U la ai khublei ïa ka sorkar Meghalaya da ka jingshim khia jong u Myntri ka tnad Food Civil Supply and Consumer Affairs ka Sorkar Jylla Bah Comingone Ymbon ban ïakren bad ka Mazdoor Union ha kaba ki la shim ïa ka rai ban bteng biang ka jingshalan umphniang sha ka jylla Meghalaya bad kin sangeh noh ïa ki jingkhih hadien ka jingïaphylliew jingmut halor ki jingeh ba ki paidbah kin sa mad lada sangeh ka jingwanrah ïa ka umphniang petrol bad diesel sha ka jylla Meghalaya.
U la ong ruh watla ka Mazdoor Union ka la sangeh ka jingïakhih hynrei kan dang ïakhun pyrshah ban pynduhjaid ïa ki kam beain ba ki kali kit umphniang ki shah tuh ïa ka umphniang petrol bad diesel ha shiteng lynti shuwa ba kin poi sha ki Petrol Pump.
Kane ka jingtuh umnphniang kam dei ka jingshah ktah tang ïa ki trai Petrol Pump ba ka dei ka hok ka jong ki bad lada kum kine ki jinglehtuh ïa ka umphniang ka dang bteng kane kan ktah ruh ïa ki paidbah ka jylla khamtam ka jingïakhih ban sangeh shalan umphniang lada ka dang bteng kan ktah nyngkong eh ïa ki paidbah lada ka jylla ka mad ïa ka jingkyrduh ïa ka umphniang.
U la ong ba ka jingkem jong ki Pulit ka Jylla Meghalaya ïa kiba don kti dang shen na Ri Bhoi, ka dei hi kaba ki lap ïa ki sakhi sabut ha kaba ki hap ban kem, namarba kane ka dei ka kam kaba long beaiñ bad ban dawa pat na ka Sorkar ba dei ban pyllait noh ïa ki, kam dei ka kamram jong ka Sorkar ban leh ïa kata bad ka la dei ka kamram jong ka ïingkashari ba kan ai ïa ka jingbishar bad lada lap ba kim don kti kin sa lait hi na ka jingpynshitom kiba dei katkum ki kyndon jong ka aiñ.
